Ўзбекистон, Тошкент - Batafsil.uz. Уй-жой харидорларининг маблағларини ҳимоя қилиш ва қурилиш компаниялари ўз мажбуриятларини бажаришини кафолатлаш мақсадида Ўзбекистонда эскроу ҳисобварақлари тизимини жорий этиш режалаштирилмоқда. Бу ҳақда Урбанизация ва уй-жой бозорини барқарор ривожлантириш миллий қўмитаси маълум қилди.
Қўмита сўнгги кунларда айрим қурилиш компаниялари фаолияти, хонадонларни топшириш муддатларининг бузилиши, харидорларга пулларнинг қайтарилмаслиги ва бир қатор қурилиш ташкилотлари раҳбарларига нисбатан жиноят ишлари қўзғатилиши жамоатчилик муҳокамаларига сабаб бўлаётганини қайд этган.
Қўмита фикрича, уй-жой сотиб олиш учун маблағ киритган фуқароларнинг на ваъда қилинган хонадонни олиши, на ўз пулини қайтариб олиши мумкин бўлган вазиятда қолишига йўл қўймаслик керак.
Бу каби муаммоларнинг олдини олиш учун ҳозирда Олий Мажлис Қонунчилик палатасида кўриб чиқилаётган "Кўп квартирали уйлар ва бошқа кўчмас мулк объектларини улуш киритиш асосида қуриш тўғрисида"ги қонун лойиҳасида эскроу тизимини жорий этиш назарда тутилган.
Ушбу механизмга кўра, харидорларнинг маблағлари махсус банк ҳисобварақларида сақланади. Пуллар қурилиш компаниясига фақат белгиланган шартлар бажарилганидан кейин ўтказилади. Бу фуқаролар маблағларидан мақсадсиз фойдаланиш ва фирибгарлик хавфини камайтиришга хизмат қилиши кутилмоқда.
Шунингдек, эскроу тизими қурилиш жараёни узлуксиз давом этишини таъминлашга қаратилган. Агар лойиҳани амалга ошираётган компания ўз мажбуриятларини бажара олмаса, қурилишни давом эттириш учун бошқа қурилиш ташкилотини жалб қилиш имконияти яратилади.
Миллий қўмита эскроу тизимини имкон қадар тезроқ жорий этиш зарурлигини таъкидлади. Идорага кўра, бу фуқароларнинг қурилаётган уй-жойлар бозорига бўлган ишончини тиклашда муҳим қадам бўлиши мумкин.
Эслатиб ўтамиз, яқинда Тошкент шаҳрида қурилиш лойиҳалари ўз вақтида топширилмагани ва мижозларнинг эътирозлари ортидан Imarat Development раҳбариятига нисбатан жиноят иши қўзғатилганди. Компания раҳбари Марат Ҳамдамов ҳуқуқни муҳофаза қилувчи органлар томонидан гумонланувчи тариқасида жалб этилиб, тегишли процессуал тартибда ушланган эди.
Изоҳлар мавжуд емас