Ўзбекистон, Тошкент - Batafsil.uz. Ўзбекистон Тоғ-кон саноати ва геология вазирлиги Мўғулистон пойтахти Улан-Батор шаҳридаги ваколатхонаси орқали мазкур мамлакатдаги конларни ўзлаштириш бўйича амалий ишларни йўлга қўйди. Тошкентда икки давлатнинг 70 дан ортиқ компаниялари иштирокида ўтказилган бизнес-форумда ушбу стратегик ҳамкорлик бошлангани расман эълон қилинди.
Бизнес-форум доирасида томонлар ўзаро товар айирбошлаш ҳажмини 100 миллион долларга етказиш ва саноат кооперациясини кенгайтиришга келишиб олганлар. Хусусан, 2029 йилга қадар Ўзбекистонда мўғул қўйлари бош сонини 1 миллионтага етказиш ҳамда Мўғулистонда Ўзбекистоннинг суғориш тизимларини жорий қилиш режалаштирилган. Шунингдек, Мўғулистон жун ва кашмир маҳсулотларини Ўзбекистонда қайта ишлаб, учинчи давлатларга экспорт қилиш бўйича қўшма лойиҳалар кўриб чиқилган.
Транспорт ва логистика соҳасида Ўзбекистон — Қирғизистон — Хитой — Мўғулистон коридори бўйлаб тўғридан-тўғри юк ташувларини ташкил этиш масаласи музокараларнинг асосий мавзуларидан бири бўлди. Тадбир якунида Suzur Health Med, Prime Nomadic Meat ва Tsamkhag Construction каби етакчи компаниялар ўртасида ўтказилган учрашувлар натижасида янги инвестициявий келишувлар пакети шакллантирилган. Маълумот учун, 2026 йилнинг биринчи чорагида Ўзбекистоннинг Мўғулистонга экспорти 15,6 фоизга ошган.
Ўтган йили Улан-Баторда биринчи ўзбек савдо уйи иш бошлаганди. Очилиш маросими бизнес-форум билан бирга бўлиб ўтганди, унда Ўзбекистон ва Мўғулистон қўшма корхоналар, жумладан, тўқимачилик ва чарм маҳсулотлари ишлаб чиқариш бўйича қўшма корхоналар ташкил этишга келишиб олган эди.
Изоҳлар мавжуд емас