Ўзбекистон, Тошкент - Batafsil.uz. Uzbekistan Airways Марказий Осиёда биринчи бўладиган тўлиқ функционал Boeing 787-9 авиатренажёри ҳақида маълумот берди. Level D даражасида сертификатланадиган ушбу тренажёр авиакомпаниянинг Ўқув-машғулот марказида жойлаштирилади.
Тренажёрни авиация тренажёр тизимларини ишлаб чиқариш бўйича дунёдаги етакчи компаниялардан бири — Канаданинг CAE компанияси тайёрлайди. Level D сертификати кабина, самолётнинг барча тизимлари ва учиш хусусиятларини ҳақиқий лайнерга максимал даражада аниқ мослаштириш имконини беради.
Янги тренажёр ишга туширилгач, Uzbekistan Airways пилотларни мамлакатнинг ўзида тўлиқ ўқитиш ва қайта тайёрлаш имкониятига эга бўлади. Илгари бундай тайёргарлик учун авиакомпания ходимларини хорижга юборишга тўғри келган, Марказий Осиёга энг яқин шу каби мажмуа ҳозир Туркияда жойлашган.
Тренажёрни харид қилиш Boeing концерни билан тузилган 22 та Boeing 787-9 лайнерини етказиб бериш бўйича йирик шартнома доирасида амалга оширилади. Янги самолётларнинг Ўзбекистонга келиши 2031 йилдан бошланиши режалаштирилган.
Лойиҳа Uzbekistan Airways Dreamliner самолётларидан фойдаланаётганига 10 йил тўлган йилда маълум қилинган. Компаниянинг биринчи Boeing 787-8 самолёти 2016 йил 31 август куни Тошкентга келган. 2017 йил ёзида эса авиакомпания ушбу лайнерда Нью-Йоркка биринчи тўғридан-тўғри парвозни амалга оширган.
Ҳозирда Uzbekistan Airways паркида олтита Boeing 787-8 самолёти мавжуд.
Тренажёрнинг Тошкентга етказиб берилиши ва фойдаланишга топширилиши муддатлари кейинроқ эълон қилинади.
Изоҳлар мавжуд емас