Ўзбекистон, Тошкент – Batafsil.uz. “Ўзбекистон темир йўллари” шаҳарлараро йўналишлар учун 40га яқин йўловчи электропоездларни харид қилмоқчи. Бу ҳақда мухбиримиз хабар бермоқда.
Таъминотчилардан тегишли таклифларни йиғиш бўйича тегишли буюртма (REOI + RFI) темир йўл компаниясининг сайтида эълон қилинган.
Ҳар-бир поезд 365та ўриндиқ ва камида 1380 нафар йўловчи сиғимига эга бўлиши керак. Шунингдек, уларда имконияти чекланган йўловчилар, шу жумладан ногиронлар аравачаларида саёҳат қиладиган йўловчилар хавфсизлиги ва қулайлигини таъминлаш учун зарур шароитлар бўлиши лозим.
Бошқа талаблар қаторида қуйидагилар кўрсатилган: темир йўл изи - 1520мм, хизмат қилиш муддати камида 30 йил, минус 40 дан плюс 50 даражагача бўлган ҳарорат оралиғида ишлаш имконияти.
Ҳозирги кунда шаҳар атрофи қатновида 45 та, шундан 6 та электропоезд қатнайди. Шаҳар атрофи йўналишидаги поездларнинг амалдаги жадвали пойтахтга ишлаш учун соат 9да келиб, соат 18:00 дан кейин жўнаб кетадиган йўловчиларнинг қулайлигини ҳисобга олган ҳолда тузилган.
Янги поездлар харид қилингач, уларни қуйидаги йўналишларда узлуксиз қатновини йўлга қўйиш режалаштирилмоқда: Тошкент – Гулистон, Тошкент – Ҳожикент, Тошкент – Ангрен, Тошкент – Бекобод, Қўқон – Поп – Наманган, Қўқон – Марғилон – Андижон, Самарқанд – Бухоро, Бухоро – Хива, Бухоро-Қарши, Хива-Нукус, Термиз – Дарбанд, Тошкент – Самарқанд, Тошкент – Бухоро ва Тошкент – Хива.
Бундан ташқари, шаҳар атрофи поездларининг тезюрар ҳаракатини ташкил этиш учун “Ўзбекистон темир йўллари” Салар–Чирчиқ–Ҳожикент темир йўл участкасини ҳамда барча тўхташ нуқталарини капитал таъмирлаш бўйича кенг кўламли ишларни амалга оширмоқда.
Изоҳлар мавжуд емас