Ўзбекистон, Тошкент - Batafsil.uz. Ўзбекистонда бола туғилганлиги тўғрисидаги маълумотномани олиш тартиби янада соддалаштирилиб, тизим тўлиқ рақамлаштирилди. Эндиликда ушбу ҳужжат электрон форматда тақдим этилади ва уни туғуруқхонага бормасдан, Ягона интерактив давлат хизматлари портали (my.gov.uz) орқали онлайн тарзда расмийлаштириш мумкин.
Мамлакатимизда 2023 йилдан бошлаб бола туғилишини автоматик рўйхатга олиш тизими йўлга қўйилган бўлса-да, шу пайтгача махсус QR-кодли маълумотномани олиш учун тиббиёт муассасасига мурожаат қилиш талаб этилар эди. Янги тартибга кўра, ушбу босқич тўлиқ рақамли форматга ўтказилган ва хизмат фуқароларга мутлақо бепул кўрсатилади.
Бола туғилганидан сўнг ФҲДЁ органларида рўйхатдан ўтказилгач, онанинг my.gov.uz порталидаги шахсий кабинетига бу ҳақда автоматик равишда хабарнома юборилади. Ҳужжатни юклаб олиш учун фойдаланувчи тизимга электрон рақамли имзо ёки OneID тизими орқали кириши, сўнгар "Маълумотномалар" бўлимидан туғилганликни рўйхатдан ўтказиш билан боғлиқ хизматни танлаши лозим.
Ушбу электрон ҳужжат анъанавий туғилганлик ҳақидаги гувоҳнома билан бир хил юридик кучга эга бўлиб, мазкур янги хизматдан 2023 йилдан бошлаб туғилган болаларнинг ота-оналари фойдаланишлари мумкин.
Маълумот учун, 2026 йилнинг биринчи чорагида Ўзбекистонда демографик ўсиш кўрсаткичлари юқорилигича қолмоқда. Январь-март ойлари давомида мамлакатимизда жами 191 086 нафар чақалоқ дунёга келган бўлиб, уларнинг 51,5 фоизини (98,5 минг нафар) ўғил болалар, 48,5 фоизини (92,6 минг нафар) эса қиз болалардир.
Изоҳлар мавжуд емас