Ўзбекистон, Тошкент - Batafsil.uz. Ўзбекистонда экстремистик ташкилотлар ва материалларнинг электрон реестрини яратиш режалаштирилмоқда. Буни назарда тутувчи экстремизмга қарши курашиш соҳасидаги қонунчиликни такомиллаштиришга қаратилган қонун Сенат томонидан маъқулланди.
Ҳужжатга кўра, экстремистик ғояларнинг интернет ва оммавий ахборот воситалари орқали тарқалишининг олдини олиш бўйича қўшимча чоралар жорий этилади. Шунингдек, хавфларни мониторинг қилиш ва баҳолаш механизмлари кучайтирилади.
Қонун билан экстремизм, сепаратизм ва ақидапарастлик ғояларини ўз ичига олган материалларни биринчи марта тайёрлаш, сақлаш ёки тарқатганлик учун жавобгарлик ҳам енгиллаштирилмоқда. Бундай ҳолатда жиноий эмас, маъмурий жавобгарлик қўлланади. Ҳуқуқбузарлик такроран содир этилган тақдирдагина жиноий жавобгарлик назарда тутилган.
Шунингдек, «диний экстремизм» тушунчаси ўрнига кенгроқ "экстремизм" тушунчаси қўлланилади ҳамда ташкилотларни экстремистик деб топиш тартиби такомиллаштирилади.
Қонунда илмий тадқиқотларни қўллаб-қувватлаш, экстремистик фаолият ҳақида хабар берган шахсларни ҳимоя қилиш, интернет ва ОАВда бундай ғоялар тарқалишининг олдини олиш ҳамда экстремистик хусусиятдаги жиноятларни содир этган шахсларни ижтимоий ҳаётга қайта мослаштириш чоралари ҳам белгиланган.
Изоҳлар мавжуд емас