Ўзбекистон, Тошкент - Batafsil.uz. Ўзбекистон Президентининг тегишли фармони билан қишлоқ хўжалиги корхоналарини молиявий қўллаб-қувватлашнинг янги тизими жорий этилди. Унга кўра, 2026 йил 1 апрелдан 1 июлгача бўлган даврда биржа орқали дизель ёқилғиси харид қилган фермерларга давлат бюджети ҳисобидан маблағ қоплаб берилади.
Субсидия миқдори ёқилғининг ҳар бир тоннаси учун 13 миллион сўмдан ошган қисмига ҳисобланиб, 2 миллион сўмгача бўлган суммани ташкил этади. Мазкур тўловлар Аграр соҳада тўловлар агентлиги орқали амалга оширилиши белгиланган.
Шунингдек, 2026 йил 1 сентябрдан бошлаб Қишлоқ хўжалигини давлат томонидан қўллаб-қувватлаш жамғармасининг айрим ваколатлари ҳам ушбу агентликка ўтказилади. Бу ўзгариш субсидия ажратиш жараёнини соддалаштириш ва шаффофлигини оширишга хизмат қилади.
Фармон билан пахта етиштирувчилар ва қайта ишловчилар учун ҳам қўшимча имтиёзлар тақдим этилган. Жумладан, пахта хомашёсини биржада сотган субъектларга электрон ҳисобварақ-фактура қийматининг бир қисми қоплаб берилади. Шу билан бирга, пахта-тўқимачилик кластерлари ва тўқимачилик корхоналарига ўз маблағлари ҳисобидан сотиб олинган хомашё қийматининг бир қисми компенсация қилиниши белгиланган.
Эслатиб ўтамиз, ўтган йилнинг 1 - 24 декабрь кунлари Ўзбекистон биржасида бир тонна пропан нархи 7,3 миллион сўмдан 7,7 миллион сўмга кўтарилганди, бу 10 фоизга қимматлашганди. Нархларнинг ошиши метан ёқилғи қуйиш шохобчаларига чекловлар ва бензин нархининг ошиши фонида содир бўлган эди.
Изоҳлар мавжуд емас