Ўзбекистон, Тошкент - Batafsil.uz. 22 апрелдан бошлаб Ўзбекистонда фуқароларни фирибгарликдан ҳимоя қилишга қаратилган онлайн кредитларни расмийлаштиришнинг янги тартиби амал қилмоқда. Тизимнинг жорий этилиши сабабли бир қатор банкларда мобил иловалар орқали ариза топширишда вақтинчалик техник узилишлар кузатилиши мумкин.
Бу ҳақда "Кредит-ахборот таҳлилий маркази" кредит бюроси мутахассислари хабар берди.
Янги қоидаларга кўра, бир мижоз томонидан бир вақтнинг ўзида бир нечта банкларга топширилган барча кредит аризалари энди КАТМ Кредит бюроси орқали тартибга солинади. Биринчи навбатда фақат биринчи юборилган ариза кўриб чиқилади. Кредит маъқулланган тақдирда, бошқа банкларга янги аризалар бериш 24 соатга вақтинча чекланади. Агар кредит рад этилса, мижоз бошқа банкларга мурожаат қилишни давом эттириши мумкин.
Бунда кредит бериш тўғрисидаги якуний қарорни ҳар бир молия муассасаси мустақил равишда қабул қилади.
Қайд этилишича, янгиликнинг асосий мақсади қисқа вақт ичида бир кишининг номига, кўпинча унинг хабардорлигисиз бир нечта кредит расмийлаштирилиши ҳолатларининг олдини олиш, шунингдек, онлайн фирибгарликдан ҳимояни оширишдан иборат.
Кредит бюроси одатдаги тартибда ишлашда давом этмоқда, тизимда узилишлар кузатилмаяпти. Бироқ, баъзи тижорат банклари ўз дастурий мажмуаларини янги талабларга мослаштириш ишларини ҳали якунламоқда, шу сабабли айнан шу банкларда онлайн кредитларни расмийлаштиришда вақтинчалик узилишлар кузатилиши мумкин.
Изоҳлар мавжуд емас