Ўзбекистонда умумтаълим мактаблари битирувчилари ўқитиш тилидан қатъи назар давлат тилидан имтиҳон топширади

Ўзбекистон, Тошкент - Batafsil.uz. 2025 йилдан бошлаб таълим ўзбек тилида олиб борилмайдиган умумтаълим муассасаларининг 9- ва 11-синф битирувчилари учун ўзбек тили бўйича якуний имтиҳонлар ўтказилиши мажбурий этиб белгиланади. Бу ҳақда Batafsil.uz мухбири хабар бермоқда.

Бу бўйича Мактабгача ва мактаб таълими вазири Ҳилола Умарованинг 2025 йил 20 февралдаги 65-сонли буйруғида келтирилган.

Бундан ташқари, ҳужжатда мактаб ўқувчиларини якуний аттестациядан ўтказиш учун умумтаълим фанлари рўйхати ва уларнинг шакли белгиланган.

Хусусан, 9-синф ўқувчилари учун якуний давлат аттестацияси фанлари рўйхатига қуйидаги фанлар қўшилди:

• она тили ва адабиёт (таълим ўзбек тилида олиб бориладиган синфлар учун) - ёзма;

• давлат тили (таълим бошқа тилда олиб бориладиган синфлар учун) - ёзма;

• математика - ёзма;

• Ўзбекистон тарихи - ёзма/оғзаки;

• жисмоний тарбия - амалий шаклда.

11-синф ўқувчиларининг якуний давлат аттестацияси қуйидаги фанларни назарда тутади:

• она тили ва адабиёт (таълим ўзбек тилида олиб бориладиган синфлар учун) - ёзма;

• давлат тили (таълим бошқа тилда олиб бориладиган синфлар учун) - ёзма;

• математика (базавий) / (чуқурлаштирилган) - ёзма;

• тарих - ёзма.

Ўқувчи танловига кўра:

• она тили ва адабиёт (таълим қорақалпоқ, рус, қозоқ, туркман, тожик, қирғиз тилларида олиб бориладиган синфлар учун) - ёзма;

• биология, физика, кимё, давлат ҳуқуқи асослари, география - ёзма;

• чет тили бўйича тест синовлари - ёзма/оғзаки.

Кутилаётган ўзгаришлар ҳақида батафсил маълумот кейинроқ берилади.

Эслатиб ўтиш жоизки, аввалроқ Ҳилола Умарова янги ўқув йилида Ўзбекистондаги барча фан ўқитувчилари вазир жамғармасидан устама олишга даъвогарлик қилиши мумкинлигини маълум қилганди.