Ўзбекистон, Тошкент - Batafsil.uz. Сербия ва Ўзбекистон эркин савдо тўғрисидаги битимни имзолашга олиб келувчи муҳим жараённи бошлашга тўлиқ тайёр. Сербия ички ва ташқи савдо вазири Ягода Лазаревичнинг маълум қилишича, унинг мамлакати ушбу преференциал савдо режимини йўлга қўяётган Европа қитъасидаги илк давлат бўлади.
Вазирнинг таъкидлашича, сўнгги бир йил давомида икки мамлакат ўртасидаги иқтисодий алоқалар сезиларли даражада фаоллашган. Сербия Президенти Александр Вучичнинг ўтган йилнинг октябрь ойида Тошкентга амалга оширган ташрифидан тортиб, Ўзбекистон Президенти Шавкат Мирзиёевнинг Сербияга ташрифигача бўлган даврда икки мамлакат ишбилармон доиралари ўртасида тўртта йирик бизнес-форум ўтказилган.
Шу баробарида Ўзбекистон ва Сербия ўртасида стратегик шериклик муносабатлари йўлга қўйилганди. Президентлар Шавкат Мирзиёев ва Александр Вучич 8 сентябрь куни Белградда бўлиб ўтган музокаралар якунида тегишли Қўшма декларацияни имзолаган эдилар.
Шунингдек, Сербия томони Жорий йилнинг биринчи ярмида Ўзбекистонда ЯИМ ўсиши 8,6 фоизни ташкил этганини ҳамда икки мамлакат иқтисодиёти бир-бирини тўлдирувчи юқори салоҳиятга эга эканини алоҳида эътироф этган.
Ўзбекистон ЯИМнинг 17,3 фоизини ташкил этувчи қишлоқ хўжалиги ва озиқ-овқат саноатида Сербия озиқ-овқат саноати ускуналари ҳамда сифатли уруғлик материалларини етказиб бермоқда.
Икки мамлакат текстиль соҳасида қўшма корхоналар ташкил этишни режалаштирмоқда. Бунда Ўзбекистоннинг арзонроқ хомашёсини Сербияда қайта ишлаш кўзда тутилган.
Ўзбекистондан Сербияга ёнғоқ ва қуритилган мевалар импортини кўпайтириш Сербия ички бозоридаги нархларни арзонлаштириш ва барқарорлаштиришга хизмат қилади.
Икки давлат компанияларининг интеграциялашуви янги иш ўринлари яратиш билан бирга, учинчи мамлакатлар бозорларига биргаликда чиқиш имкониятини беради.
Изоҳлар мавжуд емас