Ўзбекистон, Тошкент - Batafsil.uz. Ўзбекистон Ташқи ишлар вазирлиги Исроил ва Эрон ўртасидаги зиддиятнинг кескинлашуви фонида мамлакат фуқароларига мурожаат билан чиқди.
Расмий баёнотда таъкидланишича, минтақада кучайиб бораётган кескинлик нафақат Яқин Шарқ, балки бутун халқаро хавфсизликка таҳдид солмоқда. Айниқса, можаролар шароитида биринчи навбатда тинч аҳоли - аёллар, болалар, оддий фуқаролар жабр кўраётгани ташвишлидир.
"Ўзбекистон ҳар доим қурол ва вайронагарчилик эмас, балки тинчлик, барқарорлик ва мулоқот тарафдори бўлиб келган ва шундай бўлиб қолади. Уруш муаммоларни ҳал қилиш воситаси бўла олмайди. Ҳар қандай урушда ҳамма ютқазади, энг катта йўқотишларни эса оддий одамлар кўради", - дейилади мурожаатда.
Ўзбекистон ТИВ ватандошларни босиқликни сақлашга ва ҳам ижтимоий тармоқларда, ҳам реал ҳаётда иғволарга берилмасликка чақирди. Айниқса, диний ёки этник адоватга асосланган баёнотларга йўл қўймаслик, шунингдек, нифоқ қўзғатишга қаратилган ҳар қандай сўзларга қарши туриш зарурлиги таъкидланди.
"Бизнинг кучимиз - ҳамжиҳатлик, бағрикенглик ва масъулиятли фуқаролик ёндашувидадир. Мамлакатда миллатлараро ва конфессиялараро тотувликни сақлаш тинчлигимиз ва хавфсизлигимиз гаровидир", - дея қайд этилган баёнотда.
Эслатиб ўтамизки, аввалроқ мутахассис Исроил ва Эрон ўртасидаги можаро Ўзбекистон иқтисодиётига қандай таъсир кўрсатаётганини тушунтирганди.
Изоҳлар мавжуд емас