Ўзбекистон, Тошкент - Batafsil.uz. Фарғона вилояти Қўштепа туманида фермер хўжалиги раҳбари ер майдонини ноқонуний сотиш ва ҳужжатларни сохталаштириб бериш эвазига катта миқдордаги маблағни ўзлаштирмоқчи бўлган вақтида ҳуқуқ-тартибот идоралари томонидан қўлга олинди. Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир натижасида ер билан боғлиқ навбатдаги фирибгарлик ҳолатига чек қўйилди.
Аниқланишича, қишлоқ хўжалиги маҳсулотлари етиштириш билан шуғулланувчи фермер ўз хўжалигига тегишли бўлган 3,7 гектар ер майдонини харидорга гўёки 7 гектар эканини айтиб, уни алдаган. У ушбу ерни фуқаро номига расмийлаштириб бериш эвазига 20 минг доллар ва 100 миллион сўм талаб қилган. Қонунбузар келишилган маблағдан 15 минг долларини учинчи шахс орқали қабул қилиб олаётган вақтида ашёвий далиллар билан ушланган.
Ҳозирда мазкур ҳолат юзасидан фермер хўжалиги раҳбарига нисбатан жиноят иши қўзғатилиб, тергов ҳаракатлари олиб борилмоқда. Мутахассислар суғориладиган ерлар давлатнинг стратегик ресурси эканини ва бундай ноқонуний ҳаракатлар мамлакат озиқ-овқат хавфсизлигига жиддий таҳдид солишини таъкидламоқдалар.
Эслатиб ўтамиз, бундан олдин Фарғонада солиқ инспектори 100 минг долларлик "ер савдоси" устида қўлга тушганди.
Изоҳлар мавжуд емас