5 миллиард сўмга яқин пул ўмарган "Ёлғиз бўри" қўлга олинди

Ўзбекистон, Тошкент - Batafsil.uz. Телеграмм ижтимоий тармоғида "Ёлғиз бўри" (Yolg’iz bo’ri) номи билан танилиб, юзлаб фуқароларни чув туширган фирибгар қўлга олинди. У жами 4 миллиард 800 миллион сўм миқдоридаги маблағни фирибгарлик йўли билан ўзлаштиргани учун озодликдан маҳрум этилди.

27 ёшли маҳкум ўз жиноий фаолиятида машина бозор каналларига интернетдан олинган қимматбаҳо автомобиллар (BYD, Prado) расмлари ва видеороликларини ўзиники каби жойлаштирган. Салонда 80–90 минг доллар турадиган янги машиналарни 50–60 минг доллар деб кўрсатиб, одамларнинг тежамкорлик иштиёқидан фойдаланган.

Автомобилни банд қилиш учун фуқаролардан 2000 доллардан 5000 долларгача (баъзан 60 миллион сўмгача) "заклад" пулларини олиб, сўнг алоқани узган ва ғойиб бўлган.

Жиноятчи ўз шахсини яшириш учун ахборот технологияларидан усталик билан фойдаланган. Бошқа шахсларнинг паспорт нусхалари ва Face ID маълумотлари орқали банк иловаларида виртуал карталар очган.

Ўзлаштирилган пулларни виртуал картадан танишларининг пластик карталарига ёки Click рақамларига ўтказиб, нақдлаштириб олган ва виртуал ҳисобни ўчириб юборган.

Қидирувга берилганда виртуал карта эгаси (бегуноҳ шахс) топилган, фирибгарнинг ўзи эса сояда қолган.

Маҳкумнинг сўзларига кўра, у осон пул топишга қизиқиб кетган ва ўз "рекорд"ларини янгилаб борган:

"Бир кун ичида максимал 100 миллионгача урардим. Бугун 5 миллион урган бўлсам, тўхта, эртага 10 миллионни қилиб ишлайман деб, изма-из қизиқиб кетдим", деган у.

Судланувчи Ўзбекистон Республикаси Жиноят кодексининг 168-моддаси 3-қисм, "б" (Фирибгарлик, такроран ёки хавфли рецидивист томонидан содир этилган фирибгарлик) ва "г" банди (ахборот тизимидан, шу жумладан ахборот технологияларидан фойдаланиб содир этилган фирибгарлик) буйича айбдор деб топилган.

Мазкур айбловлар билан унга 5 йил-у 1 ой муддатга озодликдан маҳрум қилиш жазоси тайинланган.

Эслатиб ўтамиз, 16 январь куни, бир гуруҳ шахслар, жумладан, Taftish.uz интернет нашри ходимлари товламачилик ва фирибгарлик жиноятларини содир этганликда гумонланиб, процессуал тартибда ушланганди.