Ўзбекистон, Тошкент - Batafsil.uz. Нью-Йорк ҳуқуқни муҳофаза қилувчи органлари томонидан ўтказилган кенг кўламли махсус амалиёт натижасида Ўзбекистон фуқароларидан иборат жиноий гуруҳ қўлга олинди. Тергов маълумотларига кўра, гуруҳ аъзолари 2025 йилнинг октябридан 2026 йилнинг апрелига қадар бўлган даврда АҚШнинг шимоли-шарқий штатларидаги омборхоналардан умумий қиймати 4,5 миллион долларлик товарларни талон-торож қилган.
Жиноий гуруҳга Муродулло Ҳасанов етакчилик қилган. Терговчиларнинг таъкидлашича, ўзбекистонлик "навқирон гангстерлар" замонавий технологиялардан фойдаланиб, юк ташувчи расмий компаниялар номидан қалбаки ҳужжатлар тайёрлаган ва шу йўл билан юк тендерларини қўлга киритган. Улар юк эгаларини алдаб, маҳсулотларни Нью-Жерси, Пенсильвания ва Виржиния штатларидаги омборлардан олиб чиқиб кетган.
Ўғирланган товарлар орасида 3,3 миллион долларлик тамаки маҳсулотлари, 432 минг долларлик элита пишлоқ навлари, қарийб 300 минг долларлик гўшт маҳсулотлари ва мис симлар бор. Тергов давомида аниқланишича, гуруҳ аъзолари қўлга киритилган маблағлар эвазига Нью-Йоркнинг Брайтон-Бич ва Кони-Айленд каби нуфузли ҳудудларида ҳашаматли ҳаёт кечирган, қимматбаҳо автомобилларда юрган.
Жиноий гуруҳ етакчиси Муродулло Ҳасанов ва унинг шериклари Нодир Кобилов ҳамда Алексей Воробьев Манхэттен судида сўроқ қилинган. Айбланувчиларнинг адвокатлари уларни "озиқ-овқат савдоси билан шуғулланувчи бизнесменлар" сифатида тақдим этишга урингани суд залида кулгига сабаб бўлган. Шунингдек, гуруҳ раҳбари Муродулло Ҳасановнинг Ўзбекистонда фирибгарлик жинояти учун халқаро қидирувда (Интерпол "қизил рўйхатд"а) экани маълум бўлган. Ҳозирда гуруҳнинг уч нафар асосий аъзоси ҳибсда қолмоқда, қолган иштирокчилар бўйича тергов ҳаракатлари давом этмоқда.
Эслатиб ўтамиз, кеча АҚШнинг Цинциннати шаҳрида жойлашган Пайcор стадиони атрофида хавфсизлик қоидаларини бузган ҳолда ноқонуний пойгалар ташкил этган 6 нафар шахслар қўлга олинганди. Ҳуқуқни муҳофаза қилувчи органлар томонидан аниқланишича, ушбу гуруҳ таркибида Ўзбекистон фуқаролари ҳам бўлган.
Изоҳлар мавжуд емас