Ўзбекистон, Тошкент - Batafsil.uz. Сурхондарё вилоятида божхоначилар Афғонистондан 52,6 килограмм гашиш ва опий гиёҳвандлик моддаларини ноқонуний олиб киришга бўлган уринишни тўхтатиб қолишди.
Жорий йилнинг 1 октябрь куни кечқурун "Айритом" чегара божхона постига кириб келган бўш юк автомобили божхона назоратидан ўтказилганида, хизмат ити машинага нисбатан шубҳали муносабат билдирган. Термиз туманида яшовчи 33 ёшли фуқаро бошқарувида бўлган ушбу транспорт воситаси дарҳол чуқурлаштирилган текширувга йўналтирилган.
Текширув давомида прицепнинг пол қисми остида махсус яширин жой ташкил этилгани ва у ерда кўп қаватли ўровда яширилган 98 та ўрам борлиги аниқланган. Экспертиза натижаларига кўра, 79 та ўрамда умумий оғирлиги 42,3 килограмм бўлган гашиш ҳамда 19 та ўрамда 10,2 килограмм опий гиёҳвандлик моддалари бўлган.
Божхона хизмати маълумотларига кўра, мусодара қилинган ушбу гиёҳвандлик воситалари қарийб 340 минг бир марталик дозани ташкил этади.
Маълумот учун, йил бошидан буён божхона органлари томонидан бошқа ҳуқуқни муҳофаза қилувчи идоралар билан ҳамкорликда 1,9 тоннадан ортиқ гиёҳвандлик воситаларининг ноқонуний айланмасига чек қўйилган.
Олдинроқ Тошкент вилоятининг Қибрай туманида дарахтлар орасига яширилган 95 килограммга яқин "гашиш" гиёҳвандлик воситаси аниқланганди. Уни олиб кетиш учун келган икки нафар фуқаро ҳам қўлга олинган эди.
Изоҳлар мавжуд емас