Ўзбекистон, Тошкент - Batafsil.uz. Театр ва кино актёри Мусулмон Юнусов ижтимоий тармоқларда вояга етмаган, ногиронлиги бўлган қизига ногиронликни қайта расмийлаштириш жараёнида ундан 300 доллар сўралганини маълум қилди. У ҳолатни текшириш ва масъулларга чора кўришни сўраб, Шаҳноза Мирзиёевага видеомурожаат йўллаган.
Юнусовнинг айтишича, унинг биринчи гуруҳ ногиронлиги бўлган онаси ва ногиронлиги бўлган вояга етмаган қизи бор. Қизининг ногиронлиги икки йил аввал расмийлаштирилган. Бу йил эса уни қайта тиббий кўрикдан ўтказиш жараёни бошланган. Қизига актёрнинг рафиқаси қаровчи сифатида расмийлаштирилиши керак бўлган.
Актёрнинг сўзларига кўра, май ойининг охири — июнь ойи бошларидан қизи учун зарур тиббий ҳужжатларни тайёрлаш мақсадида турли шифокорларга мурожаат қилган. Кейин ҳужжатлар Сергели туманидаги ВТЭКка тақдим этилган.
Юнусовнинг таъкидлашича, ҳужжатлар топширилганидан икки кун ўтиб, 71-сонли поликлиника ҳамшираси унинг рафиқасига қўнғироқ қилган. Актёрнинг баёнотига кўра, суҳбат давомида қизига 18 ёшгача ногиронлик расмийлаштириш ва рафиқасини қаровчи сифатида белгилаш эвазига 300 доллар сўралган.
"Гап пулнинг миқдорида эмас. Мен бу пулни топишга ҳаракат қилардим. Лекин даволаниш ва фарзанди учун пул топишга қийналаётган оилалар бор", — деди актёр.
Юнусовнинг айтишича, у мазкур масала юзасидан ҳамшира билан телефон орқали гаплашганидан кейин унга жавоб бериш тўхтатилган. Кейинчалик қизига ногиронлик расмийлаштирилган. Актёрнинг таъкидлашича, қизи ўзини ўзи мустақил равишда парвариш қила олмайди ва кундалик эҳтиёжларини қондиришда бошқа шахс ёрдамига муҳтож. Шунга қарамай, бу ҳолат инобатга олинмаган ва унинг рафиқаси болага қаровчи сифатида расмийлаштирилмаган.
Актёр ушбу ҳолат бўйича Сергели тумани ижтимоий ҳимоя органларига ҳам мурожаат қилганини билдирди. Бироқ унинг сўзларига кўра, мурожаатидан кейин ҳам масала ҳал этилмаган.
Мусулмон Юнусов Шаҳноза Мирзиёевадан ҳолатни шахсан назоратга олиш ва ногиронлиги бўлган болалар ҳамда уларнинг оилаларидан ногиронликни расмийлаштириш учун пул талаб қилинган-қилинмаганини текширишни сўраган.
Шу билан бирга, 300 доллар талаб қилингани ҳақидаги маълумот актёрнинг баёнотига асосланган бўлиб, ҳолат ҳуқуқни муҳофаза қилувчи органлар томонидан текширилиши керак.
Бундай ҳолатлар аввал ҳам қайд этилган. Хусусан, Самарқанд ва Хоразм вилоятларида фуқароларга ногиронлик нафақасини расмийлаштириб беришни ваъда қилиб, пул олган икки шифокор қўлга тушган эди. Уларга нисбатан фирибгарлик ва пора бериш билан боғлиқ моддалар асосида жиноят ишлари қўзғатилган.
Изоҳлар мавжуд емас