Ўзбекистон, Тошкент - Batafsil.uz. Ижтимоий тармоқларда Андижон шаҳрида йўловчи ташувчи давлат электробуси салонида ҳайдовчи ва ёш болали аёл ўртасида содир бўлган жиддий тортишув акс этган видеолавҳа тарқалди ва кенг муҳокамаларга сабаб бўлди. Гувоҳларнинг ҳамда видео муаллифининг маълум қилишича, низога ҳайдовчининг йўловчи аёлдан болалар аравачасини (коляска) йиғиштириб олишни ва болани қўлига ушлашни талаб қилгани сабаб бўлган.
Ҳайдовчи ўз талабини салон ичидаги аравача бошқа йўловчиларнинг ҳаракатланишига ноқулайлик туғдираётгани билан изоҳлаган. Бироқ салон ичида одам тирбанд бўлгани сабабли, аёл боласини дарҳол қўлига олиш имкониятига эга бўлмаган ва бу вазият томонлар ўртасидаги оғзаки айтишувга айланиб кетган.
Жараён давомида автобусдаги бошқа йўловчилар ҳам баҳсга аралашиб, вазиятни юмшатишга ва аёлга боласини ушлаб туришда кўмаклашишга ҳаракат қилишган. Шунга қарамай, электроавтобус ҳайдовчиси ўзаро гап талашиш ортидан транспорт воситасини ҳаракатдан тўхтатган.
Гувоҳларнинг сўзларига кўра, ҳайдовчи жазирама иссиқ кунда салон давомидаги ўнлаб йўловчиларнинг вақтини олиб, тахминан 5-10 дақиқа давомида йўналиш бўйлаб юришдан бош тортган. Ижтимоий тармоқ фойдаланувчилари ва жамоатчилик фаоллари томонидан ушбу ҳолатда ҳайдовчининг хизмат мажбуриятларини четга суриб, йўловчилар билан баҳслашиши ва ҳаракатни асоссиз тўхтатиб туриши профессионал этикага тўғри келмаслиги баён этилмоқда.
Айни пайтда мазкур ҳолат юзасидан мутасадди транспорт идоралари томонидан расмий муносабат берилмаган.
Изоҳлар мавжуд емас