Ўзбекистон, Тошкент - Batafsil.uz. Қашқадарё вилоятида ҳуқуқ-тартибот идоралари ходимлари ўз рафиқасини аёвсиз калтаклаган эркакни қидирмоқда. Аёл жонлантириш бўлимида. Эркак аввалроқ оиладаги зўравонлик учун жавобгарликка тортилган, бироқ озодликка чиққандан сўнг яна хотинига ташланган.
Воқеа ижтимоий тармоқларда эълон қилинганидан сўнг маълум бўлди. Омбудсманнинг Қашқадарё вилояти бўйича вакиллари хотин-қизлар масалалари бўйича мутахассислар билан биргаликда жабрланувчининг шифохонадаги ҳолидан хабар олиб, воқеа тафсилотларини аниқлади.
Аёлнинг сўзларига кўра, у жорий йилнинг февраль ойидан буён уч фарзанди билан турмуш ўртоғидан алоҳида яшайди. Ҳужум куни эркак алдов йўли билан уйга кириб, хонадон соҳибаси уйга қайтгач, уни ҳушидан кетгунча калтаклаган. Бундан ташқари, жабрланувчининг таъкидлашича, у қизларининг пуллари, тилла тақинчоқлари ва мобил телефонларини олиб кетган.
Аёл ёрдам сўраб мурожаат қила олмаган, чунки хонадонга ўрнатилган огоҳлантириш тугмаси электр тармоғидан узилган бўлган.
Ҳозирда жабрланувчи жонлантириш бўлимида. Ўтказилган текширув синишларни аниқламади, бироқ шифокорлар унинг ҳолатини кузатишда давом этмоқда.
Маълум бўлишича, бу оилавий зўравонликнинг биринчи ҳолати эмас. Июнь ойида аёлга ҳимоя ордери берилган, июль ойи охирида эса суд эркакни унга тан жароҳати етказгани учун етти суткага маъмурий қамоққа олган. Бироқ, 1 август куни, озодликка чиққанидан кўп ўтмай, у яна турмуш ўртоғининг олдига бориб, яна зўравонлик қилган.
Мазкур ҳолат юзасидан жиноят иши қўзғатилган. Гумонланувчи қидирувга берилган.
Аввалроқ собиқ ҳарбий хизматчи хотинига нисбатан зўравонлик қилгани учун колонияга юборилган эди. У рафиқасини уриб, кўп қаватли уйнинг ертўласига қамаб қўйган.
Изоҳлар мавжуд емас