Ўзбекистон, Тошкент - Batafsil.uz. Тошкент вилоятида "Яллама" чегара божхона пости ходимлари фуқаронинг ҳужжат ва буюмларини текшириш жараёнида қонунбузарликни аниқлади. Текширув чоғида фуқаронинг қўл сумкасидан чақалоқ таглиги ичига маҳкам ўралган ҳолда яширилган икки дона олтин қуйма топилди.
Маълумотга кўра, куймаларнинг умумий оғирлиги 111 грамм ва дастлабки ҳисобларга кўра қиймати 133 миллион сўмга тенг.
Ҳозирда ҳолат юзасидан божхона органлари суриштирув ҳаракатларини олиб бормоқда.
Қонунчиликка кўра, жисмоний шахслар 65 граммгача бўлган олтин ва 200 граммгача бўлган кумушдан ясалган тайёр заргарлик буюмларини декларациясиз олиб чиқиши мумкин. Ортиқча миқдордаги буюмлар эса фақат божхона декларацияси орқали олиб чиқилишига рухсат этилади.
Эслатиб ўтамиз, Самарқандда "Жартепа" божхона постида багаж сумкасининг темир тутқичларига олтин кукунига ўхшаш ярим килограмм моддани яшириб, мамлакатга олиб кирмоқчи бўлган йўловчи ушланганди. Аниқланган юкнинг қиймати 520 миллион сўмдан ортиқ баҳоланган.
Изоҳлар мавжуд емас