Ўзбекистон, Тошкент - Batafsil.uz. Жиноят ишлари бўйича Бухоро шаҳар суди томонидан ота-онасини қасддан ўлдиришга суиқасд қилиш ҳамда ўзганинг мулкини нобуд қилишда айбланган 29 ёшли фуқарога нисбатан суд ҳукми эълон қилинди. Суд ҳужжатлари билан Batafsil.uz мухбири танишиб чиқди.
Маълумотларига кўра, судланувчи турмуш ўртоғи ва фарзанди билан ижарада яшаб келган. Унинг онаси Бухоро шаҳридаги ҳовлисини 60 000 долларга сотиб, ўрнига Абдулазим Сомий кўчасидаги кўп қаватли уйдан 45 000 долларга хонадон харид қилган.
Судланувчи хонадонни таъмирлашда ёрдамлашган ва у ерга келини билан кўчиб киришни режалаштирган. Бироқ онаси келини билан муносабати ёмонлиги сабабли уларнинг бу уйда яшашига кескин қаршилик қилган.
2026 йил 15 май куни кечқурун судланувчи ва онаси ўртасида навбатдаги жанжал келиб чиққан. Жанжал давомида судланувчи уйдаги телевизорни тепиб синдирган, онаси эса ИИБга мурожаат қилган.
Профилактика инспектори хонасида томонлар ўзаро ярашиб, далолатнома тузилган бўлса-да, судланувчи уйга қайтгач, онасидан яна рад жавобини олган ва оилавий низо чуқурлашган.
Аламда қолган айбланувчи соат 22:00 ларда заправкадан 1,5 литрли елим идишда бензин ҳамда дўкондан гугурт сотиб олган. Соат 23:20 ларда уйга қайтиб, отаси ва онаси бўлган ётоқхона эшигини ташқаридан ёпиб (қулфлаб), даҳлиз қисмига бензин сепган ва олов қўйган.
Олов гуриллаб кетгач, у орқа эшик орқали воқеа жойидан қочиб кетган. Хонада қамалиб қолган ота-она эшик дастасини ва эшикни тепиб синдириб, атрофдаги қўшнилар ва ўт ўчирувчиларнинг ёрдами билан куйиш жароҳатлари олган ҳолда ташқарига чиқишга муваффақ бўлишган. Ўз вақтида кўрсатилган тез тиббий ёрдам сабабли уларнинг ҳаёти сақлаб қолинган.
Ёнғин кўп қаватли уйнинг кириш йўлагини ва юқори қаватларини қуюқ қора тутун билан қоплаган, натижада бошқа хонадондаги аҳолининг ҳам ҳаёти хавф остида қолган.
Кимёвий ва товаршунослик экспертизалари хулосасига кўра, ёнғин оқибатида жабрланувчининг хонадонига 75 570 000 сўм, кўп қаватли уйнинг кириш йўлагига (подъездга) 11 441 000 сўм, қўшни хонадон эгаларига 5 386 000 сўм моддий зарар етказилган.
Суд жараёнида судланувчи судланувчи айбига иқрор бўлмай, ота-онасини ўлдириш нияти бўлмаганини, уларни уйда йўқ деб ўйлаб, алам устида ўзини ўлдириш учун бензин сепганини ва оёғи куйгач фикридан қайтиб қочганини даъво қилган.
Шунингдек, судда ота-онаси ҳам ўз кўрсатувларини ўзгартириб, ёнғин вақтида уйда бўлмаганини, ёнғинни кўриб буюмларни қутқариш учун ичкарига кирганда куйиб қолганликларини айтиб, фарзандини ҳимоя қилишга уринишган.
Бироқ суд уларнинг бу важларини маҳкумнинг жазосини енгиллаштиришга қаратилган уриниш деб баҳолаган. Чунки судланувчининг жиноят жойидаги дастлабки кўрсатувлари, тиббий экспертиза хулосалари (унда ҳеч қандай куйиш изи топилмаган), телефон сўзлашувлари стенограммаси (турмуш ўртоғига "отам билан онам хонада эди, уйни ёқиб юбордим" деган аудиоси) ва воқеа жойини кўздан кечириш баённомалари орқали унинг айби тўлиқ ўз исботини топган.
Суд судланувчини Жиноят кодексининг 25, 97-моддаси 2-қисми "а, в, д, ж, и" бандлари (Ожиз аҳволдаги икки ёки ундан ортиқ шахсни, бошқалар ҳаёти учун хавфли усулда, ўта шафқатсизлик билан, тамагирлик ниятида қасддан одам ўлдиришга суиқасд) ҳамда 173-моддаси 2-қисми "б" банди (Атрофдагилар учун хавфли усулда ўзганинг мулкини қасддан нобуд қилиш) билан айбли деб топган.
Жиноят Кодексининг 59-моддасига асосан, тайинланган жазоларни қисман қўшиш йўли билан судланувчига 15 йил 6 ой муддатга озодликдан маҳрум қилиш жазоси тайинланган. Жазони умумий тартибли колонияларда ўташ белгиланган.
Изоҳлар мавжуд емас