Ўзбекистон, Тошкент - Batafsil.uz. Бухоро шаҳрида 19 ёшли қиз шахсий фото ва видеоларни ошкор қилиш билан таҳдид қилиб, йигитдан 2 минг доллар талаб қилган вақтда қўлга олинди.
Ҳуқуқни муҳофаза қилувчи органлар маълумотига кўра, гумонланувчи синглиси ва унинг йигити ўртасидаги шахсий муносабатлар ҳақида хабар топиб, ушбу маълумотлардан моддий манфаат кўриш мақсадида фойдаланишга уринган.
Қайд этилишича, у йигитга тегишли шахсий фото ва видеоларни қариндошларига юбориш, ижтимоий тармоқларда тарқатиш ҳамда турли идораларга мурожаат қилиш билан таҳдид қилган.
Очиқланишидан ва обрўсига путур етишидан хавотирланган йигит гумонланувчининг талабини қабул қилиб, унга 2 минг доллар беришга рози бўлган.
2 июнь куни Бухоро шаҳридаги Bukhara City мажмуаси ҳудудида ўтказилган тезкор тадбир давомида қиз келишилган пул маблағини олаётган вақтида ашёвий далиллар билан ушланган.
Маълум қилинишича, гумонланувчи муқаддам жиноий жавобгарликка тортилган бўлиб, унга нисбатан товламачилик аломатлари билан жиноят иши қўзғатилган.
Ҳозирда мазкур ҳолат юзасидан тергов ҳаракатлари олиб борилмоқда.
Олдинроқ Тошкент шаҳри Яккасарой туманида профилактика инспектори интим хизмат кўрсатувчи аёлларга нисбатан чора кўрмаслик ва рейдлар ҳақида олдиндан огоҳлантириб туриш эвазига ҳар ой 400 доллар талаб қилгани аниқланганди.
Изоҳлар мавжуд емас