Ўзбекистон, Тошкент - Batafsil.uz. Тошкент шаҳри Яккасарой туманида профилактика инспектори интим хизмат кўрсатувчи аёлларга нисбатан чора кўрмаслик ва рейдлар ҳақида олдиндан огоҳлантириб туриш эвазига ҳар ой 400 доллар талаб қилгани аниқланди.
Суд ҳужжатлари билан Batafsil.uz мухбири танишиб чиқди.
Суд ҳужжатларида келтирилишича, Яккасарой тумани 4-сонли ИИБ Ҳуқуқбузарликлар Профилактикаси Бошқармаси профилактика катта инспектори бўлиб ишлаган шахс "Истанбул сити" турар жой мажмуасида яшовчи аёлларга нисбатан маъмурий чора кўрмаслик, шунингдек, ҳуқуқни муҳофаза қилувчи органлар томонидан ўтказиладиган "Орият" тадбирлари ҳақида олдиндан хабар бериб туриш эвазига пул талаб қилган.
Маълум қилинишича, аёллардан бири ушбу ҳолат юзасидан ҳуқуқни муҳофаза қилувчи органларга мурожаат қилган. Шундан сўнг, 2025 йил 28 ноябрь куни тегишли орган ходимлари ҳамкорлигида тезкор тадбир ўтказилган.
Тадбир давомида инспектор аризачи аёлдан 400 долларни олаётган вақтида ушланган. Марказий банк маълумотига кўра, ўша вақтда мазкур сумма 4 миллион 747 минг 200 сўмга тенг бўлган.
Судда инспектор айбини қисман тан олган. У пулни олганини инкор этмаган, бироқ пора талаб қилмаганини айтган. Шу билан бирга, у маблағни шахсий эҳтиёжи учун олганини билдирган.
Жабрланувчи аёлнинг кўрсатмасига кўра, профилактика инспектори аввал ҳам турли вақтларда 200 минг сўмдан 400 долларгача пул олиб турган. Эвазига эса рейдлар ҳақида огоҳлантириш ва маъмурий баённома расмийлаштирмасликка ваъда берган.
Жиноят ишлари бўйича Миробод туман суди айбланувчини пора олишда айбдор деб топган. Суд дастлаб қўйилган "тамагирлик йўли билан пора олиш" айбловини қайта квалификация қилган ва уни Жиноят кодексининг 210-моддаси 1-қисми билан айбдор деб ҳисоблаган.
Ҳукмга кўра, собиқ профилактика инспектори 4 йилга озодликдан маҳрум қилинган. Шунингдек, унга 2 йил давомида ички ишлар органларида ишлаш тақиқланган.
Олдинроқ Тошкент шаҳрида профилактика инспектори 10 минг доллар пора олаётган вақтида қўлга олинганди.
Изоҳлар мавжуд емас