Ўзбекистон, Тошкент - Batafsil.uz. "Ўзбекча гапиришни сўрагани учун самолётдан тушириб юборишди" деган блогер Komil_vlogs ва Centrum Air ўртасидаги можаро барҳам топди.
Эслатиб ўтамиз, 5 октябрь куни Centrum Air авиакомпаниясининг Самара — Тошкент йўналишидаги C6468 рейсида ўзбек тилида мулоқот қилиш масаласи ортидан сезиларли низо келиб чиққанди ва оқибатда йўловчи рейсдан олиб қолинганди.
Тарқалган видеодаги авиакомпания стюардессаси блогердан узр сўраб, йўловчининг кўнглини оғритгани учун афсус билдирган. У бу ҳолат ўзи учун сабоқ бўлганини ва бундай вазият бошқа такрорланмаслигини айтган.
"Сиздан узр сўрайман. Орамизда тушунмовчилик ўтган бўлса, узр. Мендан айб ўтди. Кўнглингизни оғритганим учун узр. Бу ҳолат мен учун сабоқ бўлди. Лекин энди такрорланмайди", — деган стюардесса.
У, шунингдек, компания номидан ҳам йўловчидан узр сўраган.
Блогер эса стюардессанинг узрини қабул қилиб, ўзи ҳам тушунмовчилик учун узр сўраган ва можарога нуқта қўйилганини билдирган.
"Опа ҳам узр сўрадилар, мен ҳам узр сўрадим, мана шу тушунмовчилик учун ҳам. Хуллас, энди кейинги босқичга ўтамиз", — деган у.
Шу тариқа, ижтимоий тармоқларда кенг муҳокама қилинган стюардесса ва блогер ўртасидаги можаро томонларнинг ўзаро узр сўраши билан якунланган.
Изоҳлар мавжуд емас