Ўзбекистон, Тошкент - Batafsil.uz. Давлат активларини бошқариш агентлигининг собиқ директори Акмалхон Ортиқов ва яна беш нафар шахсга нисбатан қўзғатилган жиноят иши бўйича суд жараёни жиноят ишлари бўйича Миробод туман судида кўриб чиқилмоқда. Миллиардлаб сўмлик маблағларни ўзлаштиришда айбланаётган агентликнинг собиқ раҳбарига қўйилган айбловлар уни узоқ муддатли озодликдан маҳрум этиш жазосига ҳукм қилиши мумкин.
Судланувчи А.Ортиқовга Жиноят кодексининг 167-моддаси 3-қисми (жуда кўп миқдорда ўзлаштириш ёки растрата йўли билан талон-торож қилиш), 206-моддаси 2-қисми (ҳокимият ёки мансаб ваколати доирасидан четга чиқиш) ҳамда 209-моддаси (мансаб сохтакорлиги) тегишли бандлари бўйича расмий айблов эълон қилинган. Мазкур жиноят иши доирасида у билан бирга Smart Expert Group раҳбари З.Жабборов, Veritas баҳолаш компанияси асосчиси З.Ниғманхонов, Master Expert таъсисчиси Р.Халиткариев, С.Саидов ҳамда Kontinent Imkon Baho баҳолаш компанияси директори Ш.Жўраев ҳам суд курсисига ўтирган.
Барча судланувчиларга талон-торожлик ва мансаб сохтакорлиги айбловлари қўйилган, шунингдек, уч нафар айбланувчига нодавлат ташкилотида ваколатларни суиистеъмол қилиш бўйича қўшимча айблов илгари сурилган. Суд мажлисида Давлат активларини бошқариш агентлиги манфаатларини муассасанинг ички аудит бўлими бошлиғи Т.Алибеков ҳимоя қилмоқда.
Эслатиб ўтамиз, А.Ортиқов 2026 йилнинг январь ойида тизимда аниқланган кўп миллиард сўмлик талон-торож ҳолатлари ва коррупциявий схемалар сабабли давлат раҳбари кўрсатмасига асосан лавозимидан озод этилган эди.
Изоҳлар мавжуд емас