Ўзбекистон, Тошкент - Batafsil.uz. Тошкентда яшовчи Леон исмли боланинг ота-онаси унда аниқланган спинал мушак атрофиясининг биринчи турини даволаш учун зарур маблағ тўплашни якунлади. Уч ой давом этган хайрия кампаниясида "Золгенсма" ген терапияси препаратини сотиб олиш учун керакли сумма йиғилган. Бу ҳақда боланинг онаси Анастасия ижтимоий тармоқларда маълум қилди.
Анастасиянинг таъкидлашича, хайрия кампанияси давомида юзлаб инсонлар оилага ёрдам берган, улардан баъзилари пул ўтказган, бошқалари эса Леон ҳақидаги маълумотларни тарқатиб, кўпроқ одамларнинг эътиборини жалб қилишга кўмаклашган.
Оила "Звезда на ладошке", "Закят" ва Нидерландиядаги "Стичтинг СМА энд ДМД Кидс" хайрия жамғармаларига, шунингдек, "Звезда на ладошке" жамғармаси бош директори Екатерина Воронцова ҳамда хонанда Кети Топурияга миннатдорлик билдирган.
Шунингдек, исмини ошкор қилмасликни сўраган бир хайриячи катта миқдорда маблағ ўтказиб, етишмаётган суммани тўлдиришга ёрдам берган. Леоннинг онаси ушбу инсонга алоҳида миннатдорлик билдирган.
Аввалроқ оила болани даволаш учун тахминан 2 миллион доллар йиғишни бошлаган эди. Уларнинг айтишича, "Золгенсма" препарати билан даволашни Леон олти ойлик бўлгунига қадар амалга ошириш зарур.
Оила, агар Леон ушбу препаратни қабул қила олмаса, йиғилган маблағларни спинал мушак атрофиясига чалинган бошқа болани даволашга йўналтиришини ҳам билдирган.
"Леон, сен учун қанчадан-қанча инсонларнинг қалби жавоб берди. Керакли маблағ йиғилди. Леон учун хайрия тўплаш якунланди. Ҳар бирингиздан миннатдормиз", — деб ёзган Анастасия.
Изоҳлар мавжуд емас