Ўзбекистон, Тошкент - Batafsil.uz. Фарғоналик тадбиркор, Madad Invest Bank молиявий ташкилотининг собиқ йирик акциядори ва кузатув кенгаши раиси Мўминжон Йўлдашев Ўзбекистон сўровига асосан Интерпол орқали халқаро қидирувга берилган. Интерпол маълумотларида унга нисбатан Ўзбекистон Жиноят кодексининг 167-моддаси 3-қисми бўйича иш юритилаётгани кўрсатилган.
Йўлдашевга қўйилаётган модда ўзлаштириш ёки растрата йўли билан талон-торож қилиш билан боғлиқ. Интерполнинг "Қизил билдируви" шахсни халқаро ҳибсга олиш ордери эмас, балки уни топиш ва экстрадиция ёки бошқа ҳуқуқий жараён учун вақтинча ҳибсга олиш бўйича давлатларнинг ҳуқуқни муҳофаза қилувчи органларига сўров ҳисобланади.
Мўминжон Йўлдашев Madad Invest Bank молиявий ташкилотининг асосчиларидан бири бўлган, банкнинг йирик акциядори ва кузатув кенгаши раиси сифатида фаолият юритган. Шунингдек, у қурилиш ва тўқимачилик соҳаларидаги бизнеслари билан танилган.
Тадбиркорнинг номи аввал ҳам халқаро молия ташкилотлари ҳужжатларида қайд этилган. Жумладан, Жаҳон банки 2019 йил 8 июлда Йўлдашевни камида тўрт йил муддатга ўз лойиҳаларида иштирок этишдан четлатган. Бунга Сирдарё сув таъминоти лойиҳаси доирасида қурилиш шартномаси учун тендерда рақобатлашган компания вакилига унинг таклифини қайтариб олиши учун босим ўтказилгани ҳақидаги айблов асос бўлган.
Жаҳон банки маълумотларига кўра, ушбу санкция 2019 йилда кучга кирган ва Йўлдашев ҳамда у бевосита ёки билвосита назорат қиладиган айрим юридик шахсларга татбиқ этилган.
Изоҳлар мавжуд емас