Ўзбекистон, Тошкент - Batafsil.uz. Москвада 19 ёшли қизга нисбатан жинсий тажовуз қилишга уринган 32 ёшли Ўзбекистон фуқароси саккиз йилга озодликдан маҳрум этилди. Ҳодиса май ойида Россия пойтахтининг шимоли-шарқидаги "Яуза" боғида содир бўлган. Қизнинг ёрдам сўраб қилган бақириқларини эшитган икки нафар йўловчи унга ёрдам бериб, гумонланувчини ушлаган.
Россия оммавий ахборот воситалари хабар беришича, воқеа куни қиз кинодан кейин уйига қайтаётган ва қулоқчинда мусиқа тинглаган. Шу пайт унинг орқасидан яқинлашган эркак қизга тегажоғлик қилиб, уни буталар орасига тортиб кетишга уринган.
Қизнинг ёрдам сўраб бақирганини эшитган икки эркак воқеа жойига етиб келиб, ҳужум қилган шахсни ушлаган ва полицияга топширган.
Сўроқ вақтида 32 ёшли эркак айбини тан олмаган. Унинг айтишича, бир неча банка пиво ичган, ётоқхонаси ёпилиб қолмасидан олдин қайтиб боришга улгурмаган ва шу сабабли боғдаги ўриндиқда тунашга қарор қилган. У қиздан фақат метро бекатига бориш йўлини сўрамоқчи бўлганини билдирган. Бироқ жабрланувчи ва икки гувоҳнинг кўрсатмалари унинг бу гапларига зид келган.
Қизга ёрдам берган эркаклардан бири воқеага аралашишга унинг бақириқларигина сабаб бўлмаганини айтган. Унинг сўзларига кўра, тахминан 20 йил аввал дўстининг рафиқаси ҳам боғда ҳужумга учраган ва ўша пайтда ёрдам чақириқларига ҳеч ким жавоб бермагани оқибатида аёл ҳалок бўлган.
Бабушкинский тумани суди Ўзбекистонда туғилган 32 ёшли эркакни жинсий хусусиятга эга зўравонлик ҳаракатларида айбдор деб топиб, умумий режимдаги колонияда саккиз йил озодликдан маҳрум этиш жазосини тайинлади.
Изоҳлар мавжуд емас