Ўзбекистон, Тошкент - Batafsil.uz. Ижтимоий тармоқларда Бухоро вилоятининг Қоракўл туманида Йўл-патруль хизмати ходимлари ҳамда ҳайдовчи ўртасида келиб чиққан кескин баҳсли ҳолат акс этган видеолавҳа тарқалди ва кенг муҳокамаларга сабаб бўлмоқда. Тарқалган тасвирларда ходимларнинг хизмат бурчини бажариш жараёнидаги хатти-ҳаракатлари, хусусан, панада ўтириб фаолият олиб боргани ва мулоқот маданияти жамоатчиликнинг ҳақли эътирозларини келтириб чиқармоқда.
Тасвирга олинган мулоқот давомида фуқаро ЙПХ ходимининг панада яширинча ўтирганини танқид қилиб, "Сиз хизмат машинасида, ўз хизмат зонасида ўтиришингиз керак, панада эмас. Қонунни сиз ўқиган бўлсангиз, мен ҳам ўқиганман", дея эътироз билдирган. Бунга жавобан ходим "Бемалол съёмка қилаверинг" дейиш билан чекланган ва вазиятни қонуний асосда хотиржам тушунтириб беролмаган. Ҳайдовчи эса ўз ҳақ-ҳуқуқларини яхши билишини таъкидлаб, ҳолат юзасидан 102 ишонч телефонига мурожаат қилганини ва ходимлардан шу ерда кутишни талаб қилганини кўриш мумкин.
Мазкур ҳолат юзасидан изоҳ олиш мақсадида Йўл ҳаракати хавфсизлиги хизмати матбуот котиби Зойир Йўлдошевга Batafsil.uz мухбири томонидан сўров юборилди.
Хўш, ўзи аслида ЙПХ ходимларининг панага кириб ёки яшириниб олиб ҳайдовчиларни назорат қилиши қанчилик қонуний?
Амалдаги йўл ҳаракати қоидалари ва Ички ишлар вазирлигининг хизмат ўташ тартиб-қоидаларига кўра, ЙПХ ходимлари ўз хизматини ошкора, очиқ-ошкора ва шаффоф тарзда олиб бориши шарт. Ходимларнинг ҳайдовчиларни яширин равишда, пана жойларга кириб кузатиши ёки сусткашлик қилиши амалдаги қонунчилик талабларига ва касбий этика қоидаларига зид ҳисобланади. ЙПХ ходими ҳайдовчига нисбатан фақатгина белгиланган хизмат ҳудудида, махсус автотранспорт воситасида ёки пиёда тарзда очиқ равишда тўхтаб ҳаракатни назорат қилиши лозим.
Мазкур ҳолат ҳуқуқни муҳофаза қилувчи орган ходимларининг аҳоли билан мулоқот маданияти, касбий этика қоидалари ва хизмат ваколатларини қай даражада тўғри бажараётганини жиддий савол остига қўяди. Вазиятни холисона ва танқидий баҳолайдиган бўлсак, ходимнинг фуқаро билан мулоқотда вазиятни қонуний асосда ва хотиржам тушунтириш ўрнига ўзини четга олиши ва ноаниқ ҳаракатлар қилиши касб этикасига тўғри келмайди.
Олдинроқ ижтимоий тармоқларда Андижон шаҳрида йўловчи ташувчи давлат электробуси салонида ҳайдовчи ва ёш болали аёл ўртасида содир бўлган жиддий тортишув акс этган видеолавҳа тарқалди ва кенг муҳокамаларга сабаб бўлганди.
Изоҳлар мавжуд емас