Ўзбекистон, Тошкент - Batafsil.uz. Самарқанд вилоятида яшовчи эркак турмуш ўртоғини ўз жонига қасд қилиш даражасига етказганликда айбдор деб топилиб, суд ҳукми билан 9 йил 6 ой муддатга озодликдан маҳрум қилинди. Суд жараёнида эълон қилинган материаллар оилада узоқ вақт давом этган зўравонлик, изоляция ва мунтазам жанжаллар ҳақидаги ҳолатларни очиб берди.
Судда ўқиб эшиттирилган кўрсатмаларга кўра, эркак турмуш ўртоғи уйни тарк этиш истагини билдирган пайтларда уни қолдириш мақсадида бир неча марта юзига урганини тан олган. Унинг айтишича, жанжаллар давомида аёл бир неча бор ота-онасининг уйига кетиш истагини билдирган, бироқ у бунга қаршилик кўрсатган.
Иш материалларига кўра, марҳума аёл Андижон вилоятида туғилган бўлиб, Самарқанд вилоятининг Каттақўрғон шаҳрида эркак билан яшаган. Қариндошларининг билдиришича, у жигар касаллиги билан оғриган ва даволанишга муҳтож бўлган. Даволаниш учун юборилган маблағлар ҳам мақсадли сарфланмагани таъкидланган.
Судда аёлнинг ташқи дунё билан мулоқоти ҳам чеклангани ҳақида маълумотлар келтирилган. Хусусан, унинг шахсий телефони бўлмагани, турмуш ўртоғи ўз телефонини фақат бир неча кунда бир марта бергани айтилган. Шу сабабли у қариндошлари билан мунтазам алоқа қила олмаган.
Материалларга кўра, аёл биргаликдаги ҳаёт давомида уч марта ота-онасининг уйига қайтган. 2025 йил апрель ойида унинг ота-онаси Каттақўрғонга келиб, қизини даволаниш учун олиб кетишга уринган. Бироқ маҳалла вакиллари ёш оилани ажратмасликка чақиргани, натижада аёл яна бир имконият беришга рози бўлгани қайд этилган. Кейинчалик маҳалла фаоллари оилада профилактик суҳбатлар ўтказгани маълум қилинган.
Ҳодисадан бир кун аввал марҳуманинг ота-онаси қизининг қичқириғини телефон орқали эшитганини билдирган. Улар қизини бир неча кунга уйига юборишни сўраган, аммо бу масалада келишувга эришилмаган.
Тергов материалларига кўра, 2025 йил 2 июль куни уйдагилар ташқарига чиққан вақтда эр-хотин уйда ёлғиз қолган. Судланувчининг кўрсатмасига кўра, жанжал вақтида аёл пичоқ билан ўзини қўрқитган, уни тўхтатишга уриниш чоғида бўйин қисмига жароҳат етган. Воқеанинг бошқа гувоҳлари бўлмаган.
2026 йил 12 январь куни суд эркакни аёлни ўз жонига қасд қилиш даражасига етказганликда айбдор деб топиб, унга 9 йил 6 ой муддатга озодликдан маҳрум қилиш жазосини тайинлаган.
Бундан олдин Фарғона вилоятида спиртли ичимлик истеъмол қилиш оқибатида келиб чиққан келишмовчилик ҳам мудҳиш жиноят билан якунланганди. Бешариқ туманида 58 ёшли эркак ўз танишини пичоқлаб ўлдирган эди.
Самарқандда аёлни ўз жонига қасд қилиш даражасига етказган эркак қамалди
19
Мақоладан таъсирланиш
Ёқади
0
Таҳсинга лойиқ
0
Хурсандчилик
0
Ҳайрон бўлмоқ
0
Тушкунлик
0
Хомушлик
0
Ҳафсаласи пир бўлмоқ
0
Ёқмайди
0
Изоҳлар мавжуд емас