Ўзбекистон, Тошкент - Batafsil.uz. Самарқанд вилояти Паяриқ тумани тиббиёт бирлашмасида ақлга сиғмайдиган ҳодиса юз берган: шифохонага "қабзият" шикояти билан келган келинчак, муолажахонада туғиб, чақалоғини челак ичига ташлаб кетган.
Шифокор Гулбаҳор Муҳаммадованинг сергаклиги ва шубҳалари бу сирли ҳолатнинг очилишига сабаб бўлган. Келин тиббий кўрик ва УТТ (УЗИ) текширувидан қатъий бош тортган бўлса-да, "тозаловчи клизма" муолажаси вақтида кутилмаган воқеа содир бўлган.
У 5-6 кунлик қабзиятдан қийналаётганини айтиб, клизма қилишни сўраган.
Шифокор беморнинг қорнини кўрмоқчи бўлганда, аёл қаршилик кўрсатган. УТТдан ҳам қочган.
Муолажахонада ҳамшираларни ташқарига чиқариб юборган аёл, ўша ернинг ўзида туғиб, чақалоқни челак ичига ташлаган ва ҳеч нарса бўлмагандек шифохонадан чиқиб кетган.
Орадан бироз вақт ўтгач, ходимлар челак ичида жонсиз ҳолда ётган, ўғил бола чақалоқни топишган.
Шифохона маъмурияти кузатув камералари орқали аёлнинг шахсини аниқлаган. Дастлаб аёл буни инкор этган, бироқ тиббий экспертиза унинг яқинда туққанини тасдиқлаган.
Экспертиза чақалоқнинг ўлими сабабини ва у тирик туғилган-туғилмаганини аниқламоқда.
Ҳозирда Паяриқ тумани ИИБ ҳузуридаги тергов бўлинмаси томонидан терговга қадар текширув ҳаракатлари олиб борилмоқда.
Эслатиб ўтамиз, март ойида Самарқанд вилояти Нуробод туманида янги туғилган чақалоқ тиббиёт муассасаси ҳожатхонасидаги канализацияга тушиб кетгани ҳақида хабарлар тарқалганди.
Изоҳлар мавжуд емас