Ўзбекистон, Тошкент - Batafsil.uz. Бош прокуратура ҳузуридаги Департамент ва Солиқ қўмитасининг коррупцияга қарши назорат бошқармаси томонидан ўтказилган терговга қадар текширув натижасида йирик миқдордаги бюджет маблағларини ўзлаштириш ҳолати аниқланди.
Ушбу жиноий схемада Солиқ қўмитаси, Бухоро вилояти солиқ бошқармаси, "Ўзбекнефтгаз" жамиятм ҳамда бир қатор компаниялар масъул шахслари ўзаро тил бириктирган. Жиноятчилар Шўртан газ-кимё мажмуасини кенгайтириш учун ажратилган 5,3 триллион сўмлик ҚҚСдан озод қилинган хизматлар учун электрон ҳисоб-фактураларга ҚҚС суммасини ноқонуний тарзда киритишган.
Жиноий схема доирасида бюджетда асоссиз ҚҚС маблағлари сунъий равишда шакллантирилган ва кейинчалик ушбу маблағлар жиноятга шк бир компаниянинг ҳисоб рақамига ноқонуний тарзда қайтарилишига эришилган. Шу орқали қўлга киритилган маблағлар ҳисобидан бошқа бир компаниянинг давлат олдидаги мавжуд кредиторлик қарздорликлари тўлиқ ёпиб юборилган.
Жами 643,2 миллиард сўмлик бюджет маблағи ўзлаштириш ва растрата қилиш йўли билан талон-торож қилинган. Айни пайтда мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари давом эттирилмоқда.
Аввалроқ Бош прокуратура ҳузуридаги Департамент томонидан ўтказилган тезкор суриштирувлар натижасида фуқароларни Жанубий Кореяга ишга юбориш баҳонасида маблағларни талон-торож қилиб келган йирик уюшган жиноий гуруҳ қўлга олинганди. Мазкур жиноий схемада Ташқи меҳнат миграцияси агентлиги ҳамда бир нечта хусусий бандлик агентликларининг собиқ мансабдор шахслари иштирок этгани аниқланган.
Изоҳлар мавжуд емас