Ўзбекистон, Тошкент - Batafsil.uz. Сурхондарё вилояти Денов туманида миллий кураш мусобақаси вақтида машҳур полвон Низомиддин Чутбоевни пичоқлаб ўлдирган 29 ёшли эркак 19 йилга озодликдан маҳрум этилди. Суд уни оғирлаштирувчи ҳолатларда қасддан одам ўлдиришда айбдор деб топди.
Ҳодиса 2026 йил 9 май куни Денов туманидаги "Янгиариқ" маҳалласида ўтказилган кураш мусобақаси вақтида содир бўлган. Маълум қилинишича, ўша куни судланувчининг укаси Чутбоевнинг ўғли билан беллашувда мағлуб бўлган.
Мусобақа жойидан кетган эркакка йўлда такси ҳайдовчиси отаси полвон билан жанжаллашганини айтган. Бу хабардан ғазабланган эркак мусобақа майдонига қайтган. У яқиндаги озиқ-овқат дўконидан ошхона пичоғини олиб, болалари кўз ўнгида Низомиддин Чутбоевга тўрт марта зарба берган.
Жароҳатланган полвон шифохонага олиб борилган, аммо шифокорлар унинг ҳаётини сақлаб қола олмаган.
Судда айбланувчи қилмишини тан олган ва жазони енгиллаштиришни сўраган. У воқеа вақтида қаттиқ ғазабланганини ва эркакка неча марта пичоқ урганини эслай олмаслигини билдирган. Ҳужумга гувоҳ бўлган марҳумнинг ўғли эса суддан айбланувчига умрбод қамоқ жазоси тайинлашни сўраган.
Суд қарорига кўра, эркак 19 йил муддатга озодликдан маҳрум қилиниб, жазони умумий тартибли колонияда ўтайди. Маълум қилинишича, у бунга қадар безорилик ва қасддан баданга оғир шикаст етказиш жиноятлари учун икки марта судланган.
Аввалроқ Андижон вилояти Қўрғонтепа туманида 3 кунлик чақалоқлигида асраб олинган йигит 18 йил давомида уни вояга етказган онасини ўлдирганди. Жиноят иши Қўрғонтепа тумани жиноят ишлари бўйича судида кўриб чиқилиб, судланувчига қамоқ жазоси тайинланган эди.
Изоҳлар мавжуд емас