Ўзбекистон, Тошкент - Batafsil.uz. Яманнинг ҳусийлар ҳаракати Саудия Арабистонига баллистик ракеталар ва дронлар билан ҳужумларни кучайтиргани ортидан Etihad Airways ва Qatar Airways мамлакатга айрим рейсларни вақтинча тўхтатди.
Хусусан, 10 октябрь куни Ар-Риёддаги халқаро аэропортга қилинган ҳужумда 12 киши ҳалок бўлиб, 309 киши жароҳатланган. Кейинги ҳужумлардан сўнг ҳам қурбонлар қайд этилган, хавфсизлик чоралари кучайтирилган ва аэропорт фаолияти чекланган.
Ҳусийлар 12 октябрь куни ҳам Саудия пойтахти Ар-Риёд томон баллистик ракета учирганини маълум қилган. Саудия томони ракетани ҳаво мудофаа тизимлари тутиб қолганини билдирган. Бу ҳужумлардан аввал ҳам Ар-Риёддаги Шоҳ Холид халқаро аэропорти бир неча марта нишонга олинган эди.
Ҳужумлар фуқаро авиацияси хавфсизлигига жиддий таъсир кўрсатган. 10 октябрдаги зарбадан кейин аэропортдаги рейслар тўхтатилган, Саудия расмийлари уни камида 17 октябрга қадар ёпиқ сақлашини билдирган. Ҳусийлар эса Саудия аэропортларини нишонга олиш ҳақида огоҳлантирган.
БААнинг Etihad Airways авиакомпанияси Абу-Дабидан Ар-Риёдга парвозларни 19 октябрга қадар тўхтатган. Жидда ва Даммом йўналишларидаги рейслар ҳам вақтинча бекор қилинган. Қатарнинг Qatar Airways компанияси ҳам минтақадаги хавфсизлик таҳдидлари сабабли Ар-Риёд ва Даммомга, шунингдек, ушбу шаҳарлардан амалга ошириладиган рейсларни тўхтатганини маълум қилган.
Авиакомпаниялар вазиятни тегишли ҳукуматлар ва авиация идоралари билан биргаликда кузатиб бормоқда. Йўловчиларга аэропортга йўл олишдан олдин рейслар мақомини авиакомпанияларнинг расмий сайтлари ёки иловалари орқали текшириш тавсия этилган.
Изоҳлар мавжуд емас