Ўзбекистон, Тошкент - Batafsil.uz. Сурхондарёнинг Шўрчи туманида 5 йил кутган фарзандидан айрилган 28 ёшли аёл туғруқхона ходимларини масъулиятсизликда айбламоқда. Марказий туғруқхонада "бу биринчи ҳолат эмас"лиги иддао қилинмоқда.
Жабрланувчининг опаси Маматова Наргизанинг Batafsil.uz мухбириги хабар беришича, 4 ноябрь куни шифохонага олиб келинган аёлнинг аҳволи бир кун ичида оғирлашган, аммо тиббиёт ходимлари керакли ёрдамни кўрсатмасдан, бола она қорнида нобуд бўлган. Мурожаатчи туман туғруқхонасида бундай фожиали ҳолатлар аввал ҳам кузатилганини иддао қилмоқда.
Ҳомиладор аёл 4 ноябрь куни Шўрчи тумани Марказий туғруқхонасига олиб келинган.
Маматова ўша куни қилинган ультратовуш текшируви (УТТ), шунингдек, бутун ҳомиладорлик даври давомидаги скрининглар ва ҳужжатлар ҳомиланинг тўлиқ соғломлигини, боши билан турганини, туғилишга тайёрлигини тасдиқлаган.
Унинг айтишича, 5 ноябрь куни тушдан кейин аёлнинг аҳволи кескин оғирлашиб, кучли оғриқ бошланган. Яқинларининг тиббиёт ходимларига мурожаатига қарамай, шифокорлар аҳволга эътибор бермаган ва текширмаган.
Таъкидланишича, шифокорларнинг бепарволиги туфайли 2-3 соат ичида соғлом ҳомила сувсиз қолиб, она қорнида нобуд бўлган. Кейинчалик, онанинг ҳаётини сақлаб қолиш учун кесарча кесиш амалиётига розилик берилган.
Мурожаатчининг айтишича, агар кесарча кесиш амалиёти ўз вақтида қилинганида болани сақлаб қолиш мумкин бўлган. Унга кўра, шифохона ходимлари масъулиятсизликка йўл қўйган ва зарур маълумотни тақдим этишдан бош тортган.
Хусусан, шифохона ходимлари ҳомиладорлик ва туғруқ жараёнларига оид тўлиқ тиббий ҳужжатларни яқинларига беришдан бош тортган. У фақатгина энг сўнгги УТТ натижаларини суратга олиб қолишга муваффақ бўлган.
Аёлнинг аҳволи оғирлашган пайтда, УТТ текширувини ўтказган шифокор ҳам аёлнинг опасига ҳолат бўйича ҳеч қандай изоҳ бермаган.
Мед-экспертиза хулосаси эса чақалоқни қабристонга кўмишга рухсат варақасини берган, холос.
Мурожаатчининг иддао қилишича, бу туғруқхонада бундай ўлим ҳолатлари биринчи марта кузатилаётгани йўқ ва агар текширув чуқурлаштирилса, аввалги фожиалар ҳам очилиши мумкин.
Фуқаро 102, Бош прокуратура ва Президент порталига расмий мурожаатлар йўллаган. Ҳозирда жиноий иш очилмаган бўлса-да, ҳолат бўйича суриштирувлар олиб борилмоқда.
Прокуратура ариза келиб тушганини тасдиқлаган.
Batafsil.uz мухбири вилоят Соғлиқни сақлаш бошқармасига ушбу масала юзасидан мурожаат қилди. Соғлиқни сақлаш бошқармаси ходими Қурбонова Муборак берган маълумотига кўра, ҳозир туғруқхонадаги воқеага алоқадор шахсларга нисбатан хизмат текшируви тайинланган.
Изоҳлар мавжуд емас