Ўзбекистон, Тошкент - Batafsil.uz. Миробод туманида икки аёл ўртасида юз берган ва ижтимоий тармоқларда кенг муҳокамаларга сабаб бўлган жанжал юзасидан Тошкент шаҳар ИИББ расмий маълумот берди. Ҳозирда мазкур ҳолат бўйича терговга қадар текширув ҳаракатлари олиб борилмоқда.
Аввалроқ бир аёл ўз эрини бошқа аёл билан кўнгилочар масканда ушлаб олиб, кўчада уни шафқатсизларча калтаклагани акс этган видео тарқалганди. Ушбу "самосуд" жараёнида аёл билан бирга бўлган бир шахс воқеани кадрга муҳрланган эди.
Ҳодиса 15 январь куни тунги соат 23:55 ларда Миробод туманининг Амир Темур кўчасида жойлашган кафелардан бирининг олдида юз берган. Жанжалда 26 ёшли ва 34 ёшли шахслар иштирок этган.
Дастлабки маълумотларга кўра, аёллар ўзаро тортишиб қолган ва бу жанжалга айланган. Расмий ахборотда таъкидланишича, тўқнашув натижасида ҳеч ким тан жароҳати олмаган.
Миробод тумани ИИО ФМБ томонидан ҳолат юзасидан суриштирув ишлари давом этмоқда. Текширув якунларига кўра, иштирокчиларнинг ҳаракатларига ҳуқуқий баҳо берилади ва қонуний қарор қабул қилинади.
Изоҳлар мавжуд емас