Ўзбекистон, Тошкент - Batafsil.uz. Тошкентда такси ҳайдовчисига нисбатан зўравонлик ишлатиб, уни ҳақорат қилган ҳамда воқеа ҳақида ижтимоий тармоқларда тасдиқланмаган маълумот тарқатган шахсларга нисбатан жиноят ишлари қўзғатилди. Ҳодиса юзасидан бир шахсга нисбатан безорилик, унинг опасига нисбатан эса туҳмат бўйича иш очилган ва гумонланувчилар қамоққа олинган.
Ижтимоий тармоқларда тарқалган видеолар ва ҳуқуқни муҳофаза қилувчи органлар маълумотларига кўра, воқеа такси ҳайдовчиси билан йўловчилар ўртасидаги келишмовчиликдан кейин содир бўлган. Ҳайдовчи йўловчининг боласи машина ичида ҳаракатланиб, унга халақит бераётганини айтган. Шундан сўнг томонлар ўртасида тортишув келиб чиққан.
Ҳайдовчининг сўзларига кўра, у йўловчига машинани тўхтатиб, тушиб қолишини айтган. Йўловчи эса унинг устидан 102 рақамига хабар берилганини билдирган. Ҳайдовчи ҳам ички ишлар ходимларини чақирган.
Кейинчалик йўловчининг яқинлари воқеа жойига келган. Улар билан тортишув давомида ҳайдовчига нисбатан куч ишлатилган. Ҳайдовчининг айтишича, у машина ичида ички ишлар ходимлари келгунча кутиб турган, бироқ уни машинадан тортиб чиқаришга уринишган ва урган.
Воқеа жойига келган шахслардан бири можарони видеога ола бошлаган. Кейинчалик ижтимоий тармоқ фаоллари ва блогерлар ҳам воқеа жойига келган. Ҳайдовчининг таъкидлашича, унга нисбатан ҳақоратлар айтилган ва ҳатто юзига туфланган.
Можародан сўнг воқеа ижтимоий тармоқларда кенг тарқалган. Айрим блогерлар ҳайдовчини йўловчига нисбатан шилқимлик қилганликда айблаган. Кейинчалик блогерлардан бири бу маълумотни воқеа тафсилотларини тўлиқ ўрганмасдан тарқатганини тан олган.
Унинг айтишича, у воқеа жойига келгач, ўша ердагилардан қисқача изоҳ олган ва унга билдирилган маълумотларга асосланиб, бир дақиқалик провакатцион видео тайёрлаган. Блогер видеони тахминан 40 дақиқадан кейин ўчирганини, аммо ўша вақтга келиб видео тарқалиб кетганини айтган.
У ўз хатосини тан олиб, ҳайдовчига нисбатан шахсий адоват бўлмаганини ва вазиятни шошилиб, нотўғри баҳолаганини билдирган. Блогер тарқатган маълумотидан пушаймон эканини айтиб, жамоатчиликдан кечирим сўраган.
Ҳуқуқни муҳофаза қилувчи органлар томонидан ҳолатга ҳуқуқий баҳо берилган.
Тошкент шаҳар ИИББ маълумотига кўра, Минглиев ва Бутаевга нисбатан Жиноят кодексининг 277-моддаси иккинчи қисми "б" банди билан жиноят иши қўзғатилган. Унга нисбатан қамоққа олиш эҳтиёт чораси танланган.
Иш материалларига кўра, Бутаев 2024 йилда ҳам безорилик билан боғлиқ жавобгарликка тортилган. Тергов органлари бу ҳолатни ҳам инобатга олган.
Шунингдек, унинг опаси Ҳусановага нисбатан Жиноят кодексининг 139-моддаси иккинчи қисми билан жиноят иши қўзғатилган. Унга нисбатан тергов ҳаракатлари давом этмоқда.
Тергов якунлари бўйича қонуний қарор қабул қилиниши айтилган.
Ҳуқуқни муҳофаза қилувчи органлар воқеа юзасидан тарқатилган айрим маълумотлар ҳақиқатга тўғри келмаслиги мумкинлигини таъкидлаб, ижтимоий тармоқ фаолларини ҳолатни тўлиқ ўрганмасдан туриб хулоса чиқармасликка чақирган.
Шунингдек, фуқаролар ва блогерлардан тасдиқланмаган маълумотларни тарқатмаслик сўралди. ИИББ қонун устуворлиги таъминланиши ва ҳуқуқбузарлик учун жавобгарлик муқаррар эканини билдирган.
Аввалроқ Самарқандда ЙПХ инспекторининг қўлини ойнага қисиб қочган Spark ҳайдовчиси қамоққа
олинганди.
Изоҳлар мавжуд емас