Ўзбекистон, Тошкент - Batafsil.uz. Тошкентда юнон-рум кураши бўйича спорт устаси ва тренер хотинига нисбатан оилавий зўравонлик содир этганликда гумонланмоқда. Тошкент шаҳар ИИББ маълумотига кўра, эркакка нисбатан Жиноят кодексининг 126¹-моддаси 3-қисми билан жиноят иши қўзғатилган.
Маълум қилинишича, жабрланувчи аёл Nemolchi.uz. лойиҳасига мурожаат қилиб, эри томонидан мунтазам калтаклангани ва таҳдидларга учраганини айтган. У икки нафар фарзанди борлигини, улардан бири 3,5 ёшда, иккинчиси эса бир ёшда эканини маълум қилган.
Аёлнинг сўзларига кўра, турмуш ўртоғи юнон-рум кураши бўйича спорт устаси бўлиб, спорт залида бош тренер сифатида ишлайди. У эри уларни таъминламаслиги, доимий равишда калтаклаши ва таҳдид қилиши сабабли ўзи ҳамда фарзандлари хавфсизлигидан қўрқаётганини билдирган.
Навбатдаги зўравонликдан сўнг аёл ҳуқуқни муҳофаза қилувчи органларга мурожаат қилган. Чақирув бўйича тез тиббий ёрдам ҳам келган, бироқ дастлаб унга тан жароҳатлари қайд этилмагани айтилган.
Аёлга суд-тиббий экспертизасидан ўтиш учун йўлланма берилиши билдирилган. Бироқ маълумотларга кўра, орадан бир суткадан ортиқ вақт ўтганига қарамай, йўлланма берилмаган. Шунингдек, ижтимоий хизмат ёки "Инсон" маркази ходимлари ҳам у билан боғланмаган.
Кейинчалик Тошкент шаҳар ИИББ маълумотига кўра, жабрланувчига ҳимоя ордери берилган ва суд-тиббий экспертизаси ўтказилган.
Шунингдек, аёл ижтимоий ҳимоя реестрига киритилиб, у билан кейинги ишлаш ва зарур ёрдам кўрсатиш чоралари белгиланган.
Ҳодиса ҳақидаги дастлабки хабар тарқалганидан сўнг ижтимоий тармоқларда тренерни қўллаб-қувватловчи фикрлар ҳам билдирилган. Nemolchi.uz лойиҳаси эса жабрланувчининг сўзларига таяниб, эркакнинг дўстлари унга қўнғироқ қилиб, аризасини қайтариб олишга босим ўтказаётганини маълум қилган.
Айни пайтда эркакнинг айби суд томонидан тасдиқланмаган. Унга нисбатан жиноят иши тергов доирасида кўриб чиқилмоқда.
Аввалроқ Тошкентда оилавий зўравонликдан жабрланган аёлга ҳимоя ўрнига эрига нисбатан эътирозларидан воз кечиш таклиф қилинганди.
Изоҳлар мавжуд емас