Ўзбекистон, Тошкент - Batafsil.uz. Куала-Лумпурдан Тошкентга учган самолёт бортида жанжал чиқариб, экипаж ва йўловчиларни ҳақорат қилган 36 ёшли Россия фуқароси етти суткага маъмурий қамоққа олинди. Унга қўшимча равишда 440 минг сўм жарима ҳам тайинланган.
Ҳодиса 5 ноябрь куни HY-552 рейсида содир бўлган. Маълум қилинишича, йўловчи самолёт бортида бир неча бор борт кузатувчисидан спиртли ичимлик олиб келишни сўраган. Бироқ у маст ҳолатда бўлгани сабабли илтимос рад этилган.
Шундан сўнг эркак экипаж аъзолари ва бошқа йўловчиларни ҳақорат қилиб, сўкинган. Борт кузатувчиларининг огоҳлантиришлари ҳам уни тўхтатмаган.
Самолёт Тошкент аэропортига қўнганидан кейин ҳуқуқни муҳофаза қилувчи органлар ходимлари бортга чиқиб, йўловчидан самолётни тарк этиш ва тушунтириш бериш учун маъмурий бинога боришни талаб қилган. Бироқ у қонуний талабларга бўйсунмаган, жанжални давом эттирган. Ҳатто қўл юкини самолёт зинасидан пастга улоқтириб, тепган.
Суд мажлисида эркак ўз айбига иқрор бўлиб, қилмишидан пушаймонлигини билдирган.
Сергели туман суди уни Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) бўйича айбдор деб топган.
Биринчи ҳуқуқбузарлик учун етти сутка маъмурий қамоқ, иккинчиси учун эса 440 минг сўм жарима тайинланган. Якуний жазо сифатида етти сутка маъмурий қамоқ белгиланган.
Изоҳлар мавжуд емас