Ўзбекистон, Тошкент - Batafsil.uz. Туркиянинг Мугла вилояти Милас туманида ўзбек келини тўйдан сўнг тақинчоқлар билан ғойиб бўлгани айтилмоқда. Оила унинг уйдан кетганидан кейин тўйда тақилган қиймати қарийб 5 миллион турк лирасига баҳоланган (103 минг доллар) тиллалар ҳам йўқолганини аниқлаган.
Маълум бўлишича, Атошоғлу оиласи 28 ёшли Ўзбекистон фуқароси Мамура Бурханова билан ўғли Мустафони турмуш қурдириш учун 19 август куни 3 куну 3 кеча давом этган тантанали тўй ўтказган. Тўйга тахминан 10 миллион лира сарфлангани айтилмоқда.
Тўй дастурига Туркияда камдан-кам ўтказиладиган, 500 йиллик анъанага эга тунги ёғли кураш ҳам киритилган. Унда Кыркпинар мусобақасининг машҳур бошпаҳлавонлари, жумладан Режеп Кара, Абдуллаҳ Гюнгёр, Файзулла Актурк ва бошқалар иштирок этган. Финалда Ялчин Унжулни мағлуб этган Файзулла Актурк бошпаҳлавонлик унвонини қўлга киритган, унинг медалини эса келин Мамура Бурханова топширган.
Тўйдан кейин келин билан алоқа узилган. Оила уни излаб уйни текширганида, тўйда тақилган тиллалар ҳам йўқлигини аниқлаган.
Шундан сўнг оила Милас Республика прокуратурасига мурожаат қилиб, шикоят берган. Прокуратура топшириғи билан Милас полицияси келин ва тиллаларни қидириш ишларини бошлаган.
Келиннинг қайнотаси Мустафо Атошоғлу тўйдаги курашларни ташкил этишнинг ўзи учун 1,5 миллион лира сарфлаганини айтган.
"Кетган пулнинг ортидан қувмаяпман. Мен ор-номусим ва ғурурим ортидан қувяпман", — деган у.
Бундан олдин ҳам Туркия фуқароси Ўзбекистонда қарийб 240 минг доллар маблағи ва мол-мулклари фирибгарлик йўли билан ўзлаштирилганини маълум қилганди.
Изоҳлар мавжуд емас