Ўзбекистон, Тошкент - Batafsil.uz. Туркиянинг Муғла провинциясида ўтган уч кунлик тўйдан сўнг йўқолган ва 5 миллион лиралик (104 минг доллар) заргарлик буюмларини ўғирлашда айбланган ўзбекистонлик аёл ўз хоҳиши билан полиция бўлимига келиб кўрсатма берди. У турмуш ўртоғи томонидан илгари сурилган айбловларни ва катта миқдордаги мулкни ўзи билан олиб кетганини тўлиқ рад этган.
Олдинроқ Туркияда ўзбек келини тўйдан сўнг тақинчоқлар билан ғойиб бўлгани ҳақида хабар берган эдик. Оила унинг уйдан кетганидан кейин тўйда тақилган тиллалар ҳам йўқолганини аниқлаганди.
Аёлнинг полицияга берган баёнотига кўра, у эри томонидан мунтазам равишда таҳдид ва руҳий-жисмоний зўравонликка учрагани сабабли уйни тарк этишга мажбур бўлган. Келин ўша куни онасининг уйига йўл олганини ва ўзи билан турмуш ўртоғи даъво қилгандек 5 миллион лиралик олтин ҳамда 300 минг лира нақд пулни эмас, балки фақат 20 та олтин танга ва 226 минг лира ( қарийб 4700 доллар) нақд пул олганини таъкидлаган.
У ўз кўрсатмаларини исботлаш учун турмуш ўртоғи билан бўлган ёзишмалар скриншотларини далил сифатида ҳуқуқ-тартибот органларига топширган ҳамда эри ва қайнотасига нисбатан расмий шикоят аризаси ёзган.
Ўз навбатида, куёв зўравонлик ҳақидаги айбловларни рад этиб, аксинча, аёли ва унинг отаси томонидан ҳақорат ҳамда таҳдидларга учраганини даъво қилмоқда.
Полиция ходимлари ўзбекистонлик аёлнинг кўрсатмаларини ёзиб олгач, уни қўйиб юборишган. Ҳозирда мазкур ҳолат юзасидан тергов ҳаракатлари давом этмоқда, ҳуқуқ-тартибот органлари ҳодисанинг барча тафсилотларини ва йўқолган тақинчоқларнинг аниқ тақдирини аниқламоқда.
Изоҳлар мавжуд емас