Ўзбекистон, Тошкент - Batafsil.uz. Туркиянинг Истанбул шаҳри Кучукчекмедже туманидаги тўйхоналардан бирида икки гуруҳ ўртасида юзага келган жанжал пичоқбозликка айланди. Ҳодиса вақтида бўйин қисмидан пичоқланган 33 ёшли Ўзбекистон фуқароси Клич Буриев шифохонада вафот этди.
Туркия оммавий ахборот воситалари хабар беришича, воқеа кеча соат 23:30 атрофида тўй маросими ўтаётган тўйхонада содир бўлган. Дастлаб икки гуруҳ ўртасида сабаби ҳозирча номаълум бўлган тортишув бошланган. Қарийб бир соат давом этган жанжал кейинчалик пичоқбозликка айланган.
Жанжал вақтида Клич Буриев бўйин қисмидан пичоқланган. Ҳодиса жойига полиция ва тез тиббий ёрдам ходимлари етиб келган. Жабрланувчига дастлабки ёрдам кўрсатилиб, шифохонага олиб кетилган, бироқ шифокорлар унинг ҳаётини сақлаб қола олмаган.
Хабарда айтилишича, жанжал иштирокчиларидан бири маст ҳолатда бўлган ва Буриевга пичоқ билан тан жароҳати етказган. Гумонланувчи Авжилар туманида ўтказилган тезкор операция давомида қўлга олинган. У билан бирга ҳодисада ишлатилган пичоқ ҳам олиб қўйилган.
Ҳозирча ҳодисага нима сабаб бўлгани ва марҳумнинг жасади Ўзбекистонга қайтарилиши бўйича маълумот берилмаган.
Изоҳлар мавжуд емас