Ўзбекистон, Тошкент - Batafsil.uz. Тошкент вилоятининг Янгийўл шаҳрида мактабга кетаётган 11 ёшли бола дайди итлар галасининг ҳужумига учради. Ҳозирда бола оғир жароҳатлар билан шифохонада қолмоқда, соҳа мутасаддилари эса ҳудудда итларни сақлаш учун махсус бошпана (приют) йўқлигини тан олмоқда.
17 январь куни бола юз, бош, қўл ва оёқларининг кўплаб йиртилган жароҳатлари билан Янгийўл шаҳар Шошилинч тиббий ёрдам марказига олиб келинган. Зудлик билан операция ўтказилиб, қон тўхтатилган ва жароҳатлар тикилган.
Бир кунлик реанимациядан сўнг боланинг аҳволи барқарорлашган. Унга психологик ёрдам кўрсатилмоқда ва қутуриш ҳамда қоқшолга қарши ваксиналар қилинган.
Боланинг юз қисмидаги жароҳатлар жиддий бўлгани сабабли, кейинги босқичда Тошкентда пластик жарроҳлик амалиётлари ўтказилиши режалаштирилган.
Боланинг отаси ва яқинларининг сўзларига кўра, ит болани судраб, бурни ва юз қисмларини аёвсиз тишлаган. Уни қўшниси қутқариб, уйига кўтариб келган. Ота фарзандининг таниб бўлмас даражада жароҳатланганини баён қилган.
Воқеа ижтимоий тармоқларда кенг муҳокама қилингач, Янгийўл шаҳар ободонлаштириш бошқармаси томонидан бошқа туманлардан ҳам кучлар жалб қилиниб, "ҳашар" ташкил этилган.
Натижада икки кун ичида маҳаллалардан 65 та дайди ит ушланган.
Масъулларнинг тан олишича, Янгийўлда дайди итлар сони ҳаддан ташқари кўп, бироқ уларни топшириш учун махсус бошпана (приют) мавжуд эмас. Шу сабабли ушланган итлар вақтинча ободонлаштириш бошқармасида сақланмоқда.
Аҳолидан дайди итлар кўпайганлиги бўйича мунтазам мурожаатлар келиб тушишига қарамай, фақатгина бола билан боғлиқ фожиадан сўнг кенг кўламли тозалаш ишлари бошланган. Мутасаддилар тез кунларда барча дайди итлар ушланишини ваъда қилмоқда.
Изоҳлар мавжуд емас