Ўзбекистон, Тошкент - Batafsil.uz. Жиззах вилояти Зомин туманида ЙҲХБ инспектори иштирокида оғир йўл-транспорт ҳодисаси содир бўлди. Хизмат ходими бошқарувидаги автомашина тўхтаб турган транспорт воситасига келиб урилиши оқибатида 35 ёшли эркак олинган жароҳатлардан шифохонада вафот этди.
Ҳодиса 26 сентябрдан 27 сентябрга ўтар кечаси туманнинг "Ёшлик" маҳалласи ҳудудида юз берган. Маълумотларга кўра, 34 ёшли фуқаро бошқарувидаги Lacetti автомашинаси олдинда чапга бурилаётган юк машинасини ўтказиб юбориш учун тўхтаган. Шу пайтда бир йўналишда ҳаракатланиб келаётган Жиззах вилояти ЙҲХБ 27 ёшли инспектори бошқарувидаги бошқа бир Lacetti ортдан келиб урилган.
Тўқнашув зарбидан оралиқда қолган машина олдиндаги юк автомашинасига бориб урилган. ЙТҲ оқибатида оралиқдаги машинада бўлган 35 ёшли йўловчи оғир тан жароҳатлари олиб, шифохонанинг жонлантириш бўлимига ётқизилган. Бироқ уч фарзанднинг отаси бўлган эркак кўрсатилган тиббий ёрдамга қарамай вафот этган.
Дастлабки хабарларга кўра, ЙҲХБ инспектори автоуловни маст ҳолатда бошқарган. Ҳозирда ушбу ҳолат юзасидан ҳуқуқни муҳофаза қилувчи органлар томонидан суриштирув ва терговга қадар текширув ҳаракатлари олиб борилмоқда.
Олдинроқ 16 июль куни соат 18:30 ларда Тошкент шаҳри Мирзо Улуғбек туманидаги "Дўрмон йўли" ва "Ғазалкент" кўчалари чорраҳасида мудҳиш йўл-транспорт ҳодисаси содир бўлганди. Мотоцикллар ва Onix иштирокидаги ЙТҲда инспектор ҳалок бўлганди.
Изоҳлар мавжуд емас