Ўзбекистон, Тошкент - Batafsil.uz. Португалия терма жамоаси ҳужумчиси Криштиану Роналду ЖЧ-2026 унинг футболчи сифатидаги сўнгги мундиал бўлишини маълум қилди. Шунга қарамай, 41 ёшли афсонавий ҳужумчи клуб миқёсидаги фаолиятини якунлаш ниятида эмаслигини билдирган.
Бу ҳақда футболчи Испанияга қарши ўтказиладиган 1/8 финал учрашуви олдидан ташкил этилган матбуот анжуманида гапириб ўтган. Роналдунинг сўзларига кўра, айни пайтда у нафақага чиқиш ҳақида қайта-қайта ўйлашни эмас, балки майдондаги ҳар бир ўйиндан лаззат олишни истамоқда.
Жорий мундиал Роналду учун фаолиятидаги олтинчи жаҳон чемпионати ҳисобланади. У ЖЧ-2026 доирасида аллақачон ўз ҳисобига учта гол ёздириб қўйишга улгурган: дастлаб Ўзбекистон терма жамоаси билан баҳсда дубль қайд этган бўлса, 1/16 финалда Хорватия дарвозасини пенальтидан ишғол қилган. Ушбу муваффақият эвазига португалиялик юлдуз олтита турли мундиалда гол урган тарихдаги илк футболчига айланган.
Ҳозиргача Роналдунинг жаҳон чемпионатларидаги умумий голлари сони 11 тага етган. Мазкур турнир у учун фаолияти давомида ҳали қўлга кирита олмаган ягона бош совринни ютиш учун сўнгги имкониятлардан биридир. Португалия терма жамоасининг Роналду давридаги энг яхши натижаси 2006 йили Германияда ўтган ЖЧда қайд этилган бўлиб, ўшанда жамоа ярим финалгача етиб борган эди.
Изоҳлар мавжуд емас