Ўзбекистон, Тошкент - Batafsil.uz. Ўзбекистон миллий терма жамоаси бош мураббийи Фабио Каннаваро Канадага қарши ўртоқлик учрашувидан сўнг жамоа ўйинига баҳо бериб, иккинчи бўлимдаги пасайиш натижага таъсир қилганини таъкидлади.
Мутахассиснинг сўзларига кўра, терма жамоа биринчи бўлимда тартибли, жипс ва агрессив ҳаракат қилган. Бироқ танаффусдан кейин ўйин суръати пасайиб, бир қатор хатоларга йўл қўйилган ва рақиб бу имкониятлардан унумли фойдаланган.
"Айнан биринчи бўлимдаги интенсивликни жамоадан кутаяпман. Бу йўналишда иш бошлаганимизга кўп бўлмади ва машғулотларда шу жиҳатга алоҳида эътибор қаратмоқдамиз", деган Каннаваро.
Мураббий совуқ об-ҳавога қарамай жамоани қўллаб-қувватлаган мухлисларга ҳам миннатдорлик билдирган. Унинг таъкидлашича, футболчилар катта ареналарда ўйнаш имкониятини қадрлаши ва жаҳон чемпионатига пухта тайёргарлик кўриши зарур.
Фабио Каннаваро келгусидаги рақиблар ҳақида ҳам фикр билдириб, Португалия, Колумбия ва Конго терма жамоаларига қарши баҳслар осон кечмаслигини қайд этган. Шу билан бирга, у футболчиларни Ўзбекистон тарихидаги илк жаҳон чемпионатида иштирок этиш имкониятидан завқ олишга чақирган.
Мураббий алоҳида тарзда Абдуқодир Ҳусановнинг ўйинига ҳам тўхталиб, ҳимоячини катта салоҳиятга эга иқтидорли футболчи сифатида таърифлаган. Унинг фикрича, футболчи келгусида янада юқори даражага чиқиш имкониятига эга.
Эслатиб ўтамиз, 2026 йилда АҚШ, Канада ва Мексика мезбонлик қиладиган футбол бўйича жаҳон чемпионатида сунъий интеллект элементлари билан жиҳозланган янги авлод "ақлли" тўпидан фойдаланилади. Технология ҳакамлик қарорларининг аниқлигини ошириш ва баҳсли вазиятларни камайтиришга қаратилган.
Изоҳлар мавжуд емас