ЖЧ-2026 тарихдаги энг "ақлли" тўп билан ўтказилади

Ўзбекистон, Тошкент - Batafsil.uz. 2026 йилда АҚШ, Канада ва Мексика мезбонлик қиладиган футбол бўйича жаҳон чемпионатида сунъий интеллект элементлари билан жиҳозланган янги авлод "ақлли" тўпидан фойдаланилади. Технология ҳакамлик қарорларининг аниқлигини ошириш ва баҳсли вазиятларни камайтиришга қаратилган.

Турнирнинг расмий тўпи бўлган "Трионда" ичига оғирлиги атиги 14 грамм бўлган махсус датчик ўрнатилган. Connected Ball Technology тизими орқали ушбу датчик тўпнинг ҳар бир ҳаракати ва тегинишини реал вақт режимида кузатиб, маълумотларни сониясига 500 марта қайд этади.

Тизим тўпнинг учиш тезлиги, ҳаракат траекторияси, айланиши ва футболчи томонидан тегилган аниқ вақтни аниқлайди. Бу маълумотлар майдон атрофида ўрнатилган юқори тезликдаги камералар орқали олинган тасвирлар билан бирлаштирилади.

Мутахассислар таъкидлашича, йиғилган маълумотлар сунъий интеллект алгоритмлари ёрдамида қайта ишланиб, ўйин эпизодларининг уч ўлчамли модели яратилади. Кейин ушбу маълумотлар VAR тизими ва ҳакамлар бригадасига узатилади.

Технологиянинг асосий вазифаларидан бири офсайд ҳолатларини юқори аниқлик билан белгилаш ҳисобланади. Датчик тўп узатилган вақтни сониянинг юздан бир улушигача бўлган аниқликда қайд этса, камералар шу вақтда футболчиларнинг жойлашувини аниқлайди.

Янги тизим қўл билан ўйнаш ҳолатлари, дарвоза чизиғидаги баҳсли вазиятлар ва видеотакрор кўриб чиқишни талаб қилувчи эпизодларни таҳлил қилишда ҳам қўлланилади.

Шунга ўхшаш технология 2022 йил Қатарда бўлиб ўтган жаҳон чемпионатидаги "Ал Риҳла" тўпида ҳам ишлатилган. Бироқ ЖЧ-2026 учун тайёрланган версия янада такомиллаштирилган бўлиб, муҳандислар датчикни махсус бўлмага жойлаштириб, тўп мувозанатини сақлаш учун қарши оғирлик тизимини ҳам ишлаб чиққан.

Олдинроқ Ўзбекистон футбол ассоциацияси миллий терма жамоанинг шу йилнинг ёзида бўлиб ўтадиган дунё биринчилигида киядиган янги экипировкасини намойиш этган эди.

Ўзбекистон бўйлаб янгиликлар: Telegram-каналга уланинг