Ўзбекистон, Тошкент - Batafsil.uz. Жорий йилнинг 18 июнь куни Мехикодаги афсонавий "Ацтека" стадионида бўлиб ўтадиган Ўзбекистон ва Колумбия терма жамоалари ўртасидаги учрашув 2026 йилги жаҳон чемпионати баҳслари ичида чипта сотилиши бўйича айни пайтгача энг юқори натижани қайд этиб турибди. Бу ҳақда ўзбекистонлик таниқли футбол функционери Алишер Никимбаев ўзининг "Футболиум" Telegram-каналида расмий маълумот тарқатди.
Тарихий мусобақа бошланиши арафасида мазкур учрашувга бўлган қизиқиш дунёнинг бошқа гранд жамоалари иштирокидаги ўйинлардан ҳам ўзиб кетган. Тақдим этилган статистик маълумотларга кўра, Ўзбекистон — Колумбия тўқнашуви учун ҳозиргача жами 74 725 дона чипта сотиб бўлинган.
Ушбу кўрсаткич мусобақанинг очилиш учрашуви ҳисобланган Мексика — Жанубий Африка Республикаси (ЖАР) ўйинидан (73 373 чипта) ҳамда футбол оламида катта эътибор қаратилаётган Бразилия — Марокаш учрашувидан (73 719 чипта) сезиларли даражада юқоридир. Маълумот учун, очилиш баҳси ҳам, Ўзбекистоннинг дебют ўйини ҳам 81 мингдан ортиқ томошабинни ўз бағрига сиғдира оладиган "Ацтека" аренасида ўтказилади.
Қайд этиш жоизки, Ўзбекистон миллий терма жамоаси ўз тарихида илк бор жаҳон чемпионатининг финал босқичида иштирок этмоқда. Жаҳон футболи афсонаси Фабио Каннаваро бошчилигидаги ўзбек футболчилари турнирнинг гуруҳ босқичида Колумбия, Португалия ҳамда Конго Демократик Республикаси терма жамоаларига қарши майдонга тушишади.
Мусобақадаги илк тарихий баҳс айнан колумбияликларга қарши ташкил этилади ва ушбу ўйинга сотилган чипталар сони ўзбек футболи атрофидаги халқаро қизиқиш нақадар юқори эканини исботламоқда.
Маълумот учун, 2026 йилги футбол бўйича Жаҳон чемпионати А гуруҳида биринчи тур учрашувлари якунланди. Гуруҳнинг марказий баҳсларидан бирида Жанубий Корея терма жамоаси Чехия устидан 2:1 ҳисобида ғалаба қозонди.
Изоҳлар мавжуд емас