Ўзбекистон, Тошкент - Batafsil.uz. ФИФА 2026 йилги Жаҳон чемпионати финалида Испания ва Аргентина терма жамоалари ўртасидаги учрашувдан кейин юзага келган можаро бўйича интизомий қарор қабул қилди. Натижада Аргентина футбол ассоциацияси 321 минг доллар жаримага тортилди, бир қатор аргентиналик футболчилар эса бир нечта халқаро ўйиндан четлатилди.
19 июль куни Нью-Йорк–Нью-Жерси стадионида Испания ва Аргентина ўртасида Жаҳон чемпионати финали бўлиб ўтган эди. Ўшанда испанлар Аргентинани қўшимча вақтда Ферран Торрес урган ягона гол эвазига 1:0 ҳисобида мағлуб этиб, ўз тарихидаги иккинчи жаҳон чемпионлигини қўлга киритганди.
Учрашувдан кейин майдонда футболчилар ўртасида низоли вазиятлар юзага келган. ФИФА интизом қўмитаси махсус тайинланган интизом ва этика прокурори ҳисоботини кўриб чиқиб, мазкур ҳолатлар бўйича санкциялар белгилаган.
Энг катта жазо Аргентина терма жамоаси футболчиси Леандро Паредесга берилган. У 10 та халқаро ўйинга четлатилди ва 90 минг доллар жарима тўлайди.
Аргентина терма жамоасининг яна бир футболчиси Науэль Молина 7 та халқаро ўйиндан четлатилиб, 90 минг доллар жаримага тортилган. Тьяго Алмада эса 1 та ўйинга дисквалификация қилиниб, 30 минг доллар жарима тўлайди.
Терма жамоа штаби вакили Роберто Айяла ҳам жазодан четда қолмаган. У 3 та ўйинга четлатилган ва 30 минг доллар жаримага тортилган.
Қизиғи, можаро фақат Аргентина вакиллари билан боғлиқ эмас. Испания футболчиси Пабло Мартин Паэс Гавира — Гави ҳам 1 та халқаро ўйинга четлатилиб, 30 минг доллар жаримага тортилган.
ФИФА маълум қилишича, футболчиларга берилган дисквалификациялар уларнинг терма жамоаларидаги кейинги халқаро учрашувларга татбиқ этилади. Яъни жазо фақат Жаҳон чемпионати доираси билан чекланиб қолмайди.
ФИФА Аргентина футбол ассоциациясига нисбатан ҳам алоҳида санкциялар қўллаган. Ассоциацияга жами 321 минг доллар миқдорида жарима солинган.
ФИФА ушбу қарорни Жаҳон чемпионати давомидаги бир нечта қоидабузарликлар, жумладан, жамоанинг номақбул хатти-ҳаракатлари, камситиш ва ирқчилик хусусиятидаги мухлислар шиорлари ҳамда имо-ишоралари, учрашувларда тартиб ва хавфсизлик талабларига риоя этилмагани билан боғлаган.
Бундан ташқари, Аргентина терма жамоаси кейинги икки уйдаги ўйинини стадион сиғимининг 50 фоизидан кўп бўлмаган миқдорда томошабин билан ўтказиши белгиланнан.
Жариманинг 100 минг доллари эса камситишга қарши кураш дастурига йўналтирилиши керак. Шу билан бирга, санкциянинг бир қисми — икки учрашувдан бирига қўйилган чеклов ва 100 минг долларлик жарима — синов муддати шарти билан вақтинча тўхтатилган.
ФИФА қарорлари ҳали якуний эмас: манфаатдор томонлар қарорнинг асослантирилган тўлиқ матнини сўраш ва белгиланган тартибда апелляция бериш ҳуқуқига эга эканлиги таъкидланган.
Изоҳлар мавжуд емас