Ўзбекистон, Тошкент - Batafsil.uz. АҚШ суди Ўзбекистонда туғилган, Канада фуқароси ва резиденти Рахим Ибрагимовни 375,1 килограмм кокаинни ташиш билан боғлиқ жиноий иш бўйича 68 ойлик қамоқ жазосига ҳукм қилди. У назорат остидаги наркотик моддаларни тарқатиш мақсадида тил бириктириш айбига иқрор бўлган. Жазони ўтаб бўлгач, у яна уч йил назорат остида бўлади.
Айблов материалларига кўра, Ибрагимов АҚШда транспорт тармоғида диспетчер бўлиб ишлаган. 2024 йил апрель ойида у Калифорния штатидаги Риверсайд шаҳрига кокаинни қабул қилиб олиш ва уни Канадага етказиб бериши керак бўлган ҳайдовчиларга топшириш учун юборилган.
Тергов маълумотларига кўра, Андрес Фелипе Пучетти Ириарте Ибрагимовга тахминан 375,1 килограмм кокаинни топширган. Наркотик моддаларни Канадага олиб ўтиш режалаштирилган. Прокуратура илтимосига кўра, Ибрагимовга нисбатан қўйилган бошқа айбловлар, жумладан, кокаинни экспорт қилиш мақсадида тил бириктириш айби бекор қилинган.
Мазкур иш Райан Жеймс Уэддинг билан боғлиқ халқаро жиноий тармоқ фаолияти доирасида кўриб чиқилган. Уэддинг — 2002 йилги Қишки Олимпия ўйинларида қатнашган собиқ канадалик сноубордчи. АҚШ прокуратураси уни АҚШ ва Канадага йирик миқдорда кокаин етказиб беришда айбланаётган трансмиллий жиноий ташкилот раҳбари деб ҳисоблайди.
Тергов версиясига кўра, ташкилот наркотикларни Колумбиядан Мексика орқали АҚШга олиб келган, кейин эса Канаданинг ҳамда АҚШнинг бошқа штатларининг ҳудудларига тарқатган. Калифорниядаги Лос-Анжелес, Сан-Бернардино ва Риверсайд округлари асосий тақсимлаш нуқталари сифатида кўрсатилган.
Жиноий иш материалларида жами 19 нафар айбланувчи қайд этилган. Терговчилар Эндрю Кларкни Уэддингнинг яқин ҳамкори деб ҳисоблайди. Айбловга кўра, улар наркотиклар етказиб беришни ташкиллаштирган, молиявий оқимларни назорат қилган ва гуруҳнинг бошқа аъзоларига кўрсатмалар берган.
Уэддинг 2025 йил март ойидан бошлаб АҚШ Федерал тергов бюросининг энг кўп қидирилаётган жиноятчилари рўйхатига киритилган. У 26 январь куни Калифорниянинг Санта-Ана шаҳрида суд олдида пайдо бўлган ва уюшган жиноий гуруҳга раҳбарлик қилгани бўйича айбни тан олмаган.
Прокуратура ташкилот аъзоларини йирик наркотрафикдан ташқари қотиллик, гувоҳларни қўрқитиш ва криптовалюта орқали пул ювишда ҳам айбламоқда. Бу айбловлар судда исботланиши лозим.
Олдинроқ Туркияга ўқиш баҳонасида олиб кетилиб, мажбурий никоҳ, жисмоний зўравонлик ҳамда мажбурий меҳнатга дучор этилган 17 ёшли Ўзбекистон фуқароси мамлакатга қайтарилганди
Изоҳлар мавжуд емас