Ўзбекистон, Тошкент - Batafsil.uz. Ўзбекистон Илон Маскнинг SpaceX ракетаси ёрдамида ўз сунъий йўлдошини учириш имкониятини кўриб чиқмоқда. Бу ҳақда Batafsil.uz мухбири хабар бермоқда.
Ушбу лойиҳа ва бошқа фойдали келишувлар Uzcosmos делегациясининг АҚШга сафари ва Space Symposium халқаро конференциясидаги иштироки якунлари бўйича маълум қилинган.
Uzcosmos вакиллари космик бозор етакчиси бўлган SpaceX компаниясининг Лос-Анжелесдаги офисига ташриф буюриб, ўзбекистонлик ёш муҳандислар Кюсю технология институтида (Япония) ўқиш давомида йиғишни режалаштираётган SpaceX ракетасида илмий-технологик сунъий йўлдошни учиришни муҳокама қилган.
Ўзбекистоннинг "Космик тадқиқотлар ва технологиялар - 2035" стратегияси бўйича фикр алмашиш чоғида SpaceX вакиллари ҳужжатнинг дастлабки лойиҳасини кўриб чиқишга ва уни такомиллаштириш бўйича ўз фикр-мулоҳазаларини билдиришга тайёр эканликларини айтишган.
Ўзбекистон делегацияси аъзолари SpaceX компаниясининг Falcon 9 ракета-ташувчисининг ишлаб чиқариш жараёнлари ва қувватлари билан ҳам яқиндан танишган.
Бундан ташқари, Ўзбекистон делегацияси дунёнинг геоахборот тизимлари учун дастурий таъминот ишлаб чиқарувчи энг йирик компанияси Esri бош қароргоҳида ташриф буюрди. Учрашувда Ўзбекистонда Esri офисини ёки технологик марказини очиш ва IT Park Uzbekistan резиденти сифатида минтақавий бўлинмани ташкил этиш ғояси ҳақида сўз борган. Қайд этилишича, Esri вакиллари Uzcosmos томонидан космик мониторинг соҳасида амалга оширилаётган лойиҳаларни юқори баҳолаган.
Эслатиб ўтамизки, аввалроқ Space Symposium доирасида Uzcosmos агентлиги ва Корея аэрокосмик маъмурияти (КАSА) ўртасида ўзаро англашув меморандуми имзолангани, унга кўра Ўзбекистон ва Корея космик таълим, фан ва тадқиқотлар, сунъий йўлдошларни ишлаб чиқиш, шунингдек, ер усти космик инфратузилмасини яратиш ва ривожлантириш соҳасида ҳамкорлик қилиши ҳақида хабар берган эдик.
Изоҳлар мавжуд емас